Dembele-a'n Monaco hmachhawn thei dawn lo

French champion Paris Saint Germain thiampuipa Ousmane Dembele chu chanchinbu ṭhenkhatin a inhliam na lo ti mah se zanin dar 1:30-a Monaco nen an inhmachhawn hunah a tel ve dawn lo.

Kum 28 mi Dembele hi kar hmasa UCL-a Monaco nen an inkhelh ṭumin hliam vangin lakchhuah a ni a, minute 27-na lekah Desire Doue-a'n a thlak. Dembele thlaktu Doue a khel ṭha a, PSG chakpui mah se Dembele inhliam vangin an lawm a kim lo.

Dembele hliam hi sawi chian ni lo mah se a tihrawl niin a lang a, Inrinni zana Metz an sawp ṭumin Dembele hi a inlan tawh lo bawk. Coach Luis Enrique chuan,"Player te dinhmun kan hrechiang a, risk ka lak ngam loh vangin Monaco lakah Dembele kha kan lakchhuah a ngai. A hliam hi kan en dik mek a, a chawlh rei loh ka beisei" a ti. Dembele hmun ruak hi Doue bawkin a luah a rinawm.

Champion lai PSG hian Dembele bakah, Senny Mayulu leh Fabian Ruiz te chu khup hliam vangin an chan a, Monaco an hmachhawn thei dawn lo. An ṭhat dan berin PSG inlan thei dawn lo mah se an squad a chhah ṭha, an muala khel tur an nih bawk avangin an inringtawk ang. Chutihrualin Monaco-in last 16 luh beiseina sang tak an la nei a, PSG barakhaih turin theihna sang tak an nei tih first leg-ah an lantir tawh a ni.