MFA Cup final-ah Meisatla vs Electric Veng

MFA Cup-ah champion lai Kolasib club Electric Vengin final an lut a, Siaha club Meisatla FC nen nomawi an inchuh ang. Inelna hi C. Ṭhuamluaia Mual, Lungleiah khelh a ni a, final hi February 27, Zirtawpni chawhnu dar 2:00-ah khelh a ni ang.

Semifinal hi nimin khan khelh a ni a, entu pawh an ṭhahnem. Hnathial club Lungleng FC leh Siaha club Meisatla FC inkhel hmuhnawm takah Meisatla an vannei tak zawk. Minute 84-naah Siaha club captain John Lalrinawma'n corner kick aṭanga ball kal chu mawi zetin goal awmchhun a tauh lut a, 1-0 a hnehna changin final an lut.

Inkhel hnuhnung zawkah minute 90 chhung goal a lut lo a, extra time khelh a nih hnuah pawh goal a la lut chuang lo. Penalty shootout hmangin chak zawk zawn a ṭul a, Kolasib lamin pet hmasain an player pawimawh Lalthanpuia'n (Tepuia) a hlah nghal. Aizawl FC Academy dinhmun ṭha hman mah se C. Mama'n a pet lut lo a, sudden death-ah Lalrinhlua'n crossbar a pet per a, penalty shootout-ah Electric Veng 6-5 in an vannei ta zawk.