Zanin dar 7:00-ah AMC Mayor's Cup 2026 final

AMC Mayor's Cup 2026 final chu zanin dar 7:30 hian R. Dengṭhuama Stadium, Mualpuiah khelh a ni dawn. Ward XII aiawh Tuikual North leh Ward I aiawh Zuangtui te an inkhel dawn.

Semifinal-ah Tuikual North-in champion tura rinkai zinga mi Electric Veng 6-4 in an hneh a, thilmak erawh a ni lo. Futsal-ah chuan Tuikual North hi team ṭha an ni a, India aiawh player awm tamna Electric Veng hneh thei turin an ṭha tawk.

Inkhel hnuhnung zawkah Zuangtuiin Bawngkawn 6-2 in an hneh a, veng hming en chuan thilmak a ni. Mahse, player neih dan thlir erawh chuan thil ni thei a ni thung. Zuangtui hian Ward I ai an awh a, an player pawimawhte erawh Durtlang tlangvalte an ni thung.

Durtlangah futsal ground a tam a, player ṭha pawh an ṭhahnem. Durtlang player Lalrinsanga, Marcus Malsawmzuala leh Ricky Lallawmawma te hi futsal-ah player ṭha an ni pha a, tun ṭum inelnaah pawh champion inbeiseina sang tak an nei ang.

Bawngkawn tan erawh result pawm thiam har tak a ni thung dawn. Football leh futsal thiam veng Bawngkawn hian nomawi chawi an harsat a, hun ṭha a inherchhuah theih nan an beidawn loh a ṭul dawn a ni.