Aizawl FC-in Ludhiana an thleng

Indian Football League 2025-26 chu February 27, Zirtawpni aṭangin khelh ṭan a ni dawn. Mizo club zinga record nei ṭha ber Aizawl FC-in khualmualah Namdhari FC an hmachhawn dawn a, nimin khan inkhelhna tur hmun Ludhiana an thleng. MPL12 champion Chanmari FC-in RG Stadium, Mualpuiah Gokulam Kerala an mikhual thung ang.

I League tih ṭhin chu tun season aṭangin Indian Football League tih a ni a, Mizo club pahnih Aizawl FC leh Chanmari FC te an tel dawn. Aizawl FC hi coach R. Lalruatfela hnuaiah an khel dawn a, Namdhari hmachhawn tur hian player 18 an zin a, Brazilian striker Higor pawh a tel a ni.