Odisha an chak zo lo

Tun season Indian Super League-ah a vawi khat nan Odisha FC an inlan ve leh ta a, an mikhual Inter Kashi nen an inhnehtawk - Thawhṭanni zana team pahnih inkhelah goal a lut lo a, 0-0 in an ṭin.

Odisha hian tun season atana an stadium tur an tihfel lawk theih loh avangin hun engemaw chen chu an kal mumal thei lo a, kar hmasa lam daih tawh khan tun season-a an league match hmasa ber chu khel tura tih an ni.

Mahse, ISL club hi an khelmual atana an hman Kalinga Stadium chungchangah Odisha sorkar nen an inrem lawk thei lo a, club pawhin a duh angin training a nei lawk thei lo - kar hmasaa Punjab FC nena an inkhel tur pawh sawn a ni hial.

Thawhṭanni zanah erawh Odisha FC an inlan ve ta a, kai thar Inter Kashi an hneh thei bik tlat lo. Odisha tan hian tlarhmaah Isak Vanlalruatfela chuan inkhel bul ṭanin, Thingsulthliah/Bawngkawn tlangval hi a khel ṭha thlawt - tlarhmaah a hnawksak ṭhin hle.

Midfield-ah K. Lalṭhathanga (Puitea) pawhin a hna ngaite thawkin inkhel bul a ṭan a, Bethlehem Vengthlang midfielder pawh khel chhe lo tak a ni - tlarhnungah Vanlalzuidika Chhakchhuak a rin tlak viau bawk.

Zuidika hian season hmasa kha Mohammedan SC-ah khelin, ISL-a a season hmasa ber a ni a, tun season-ah Odisha lamah insawnin, an league match hmasa berah bul a ṭan lehnghal.

Hetihlai hian Odisha player beiseiawm Jeremy Zohminghlua pawh bench aṭanga luhtir a ni a, season khat tawp a inlan loh hnuah ISL-ah a inlan ve leh ta a, hmun pawimawh chan chhunzawm zel a beisei ang.

ISL hi nizanah inkhel awm lo mah se, zanin dar 7:30-ah erawh en tur a awm leh dawn a, FC Goa chuan Sporting Club Delhi an mikhual ang - Goan club hian defender Jerry Lalrinzuala, midfielder Ayush Chhetri leh Malsawmtluanga, forward Daniel Lalhlimpuia te ho an kawl.

Sporting Delhi pawhin midfielder Isaac Vanmalsawma, forward pahnih Ramhlunchhunga leh Augustine Lalrochana te an kawl a, Aizawl FC forward hlui Augustine hian East Bengal lakah ISL-a a goal hmasa ber a khung bawk. Zanin inkhel hi en a manhla khawp ang.