Berbatov vang a ni lo - Sesko

Tun hnaia Manchester United tana che ṭha tak, Slovenian striker Benjamin Sesko chuan tun hnaiah, United striker hui Dimitar Berbatov hnen aṭanga goal shot dan chungchanga thurawn la anga sawi chu a pha a, Sesko chuan, "Inbia ila chu ka lawm ngawt ang. Mahse, kan inbe lo," tiin media ho kawmna a chhang.

Kum 22 mi Sesko hian nipui transfer lai khan RB Leipzig aṭangin Manchester United hi pound maktaduai 74-in zawm a, mahse, mipui beisei anga a khelhchhuah loh avangin dem a hlawh hman hle. Mahse, tun hnaiah Sesko-a'n goal khung a uar thar.

Sesko hian United tan inelna hrang hrangah match 24 khelin goal riat a khungsak tawh a, a goal khung tam zawk erawh, tun hnaia a khung niin, a match hnuhnung pasarihah goal ruk a khung - minute 45 dan zela goal khung ang a ni phak hial!

Slovenia international hian Thawhṭanni zan pawh khan Everton lakah goal khungin, Manchester United chu 1-0 in hnehna a chanpui. Mahse, Berbatov hnen aṭanga goal khung dan zir anga sawi awm erawh a pha nasa hle.

Sesko chuan, "Zep tur a awm lo - Berbatov nen titi dun anga min sawi hi ka lo hria a, mahse, inbiakna engmah kan nei lo. Inbiak ngei erawh ka duh a, a nuam ngawt ang. Mahse, kan inbe tlat lo. Coaching staff, ni tin maia min thawhpuitute kan nei a, anni min enkawlna hian min pui hle," a ti.

Manchester United striker hian club assistant coach Travis Binnion nena an thawh dun dan pawh sawi langin, "Training engkim zawh tawh hnuah, box leh a pawn aṭanga shot dan te, engkim mai kan zir leh ṭhin - Premier League-ah chuan inngaihtuahna hun hi kan nei hman lo a ni ber mai.

"Hetah tak hian Travis-a min puihna hi ka chhawr ṭhin a, player dang pawh an ni vek ang," a ti a, tun hnaia a hcet ṭhat chhan chu coaching staff leh a bik takin assistant coach Travis a nih thu a sawi lang.

Sesko hi a man a tam avangin en bik a hlawh a, United ber kher a zawm avangin pressure a sang bawk. Mahse, Slovenian striker chuan, "Kei chuan pressure hi ka pawm thiam khawp mai. Player ṭha tak nih kan tum chuan pressure kan hmachhawn ve a ngai alawm!

"Level sang taka kan khel duh a nih chuan pressure kha a ken tel a ni a, hetiang boruakin min tuam vel hi kei chuan a lawmawm ka ti zawk. Pressure hian engti kawng mahin min nghawng lo a, tlarhmaa ka khelhpui Matheus Cunha leh Bryan Mbeumo te pawh keimah ang tho an ni ang," a ti.

United hian coach Michael Carrick-a kaihhruaina hnuaiah league match ruk khel tawhin, tlawm an la nei miah lo - vawi nga hnehna an chanhg a, vawi khat an khingpui West Ham chu an hnehtawkpui thung.

Premier League table-ah pawh United hi palina ni mekin, season thara Champions League khelh an beiseina chu an player hlui Carrick-a kaihhruaina hnuaiah an chhi nung ve zel.