England-in semifinal an lut

T20 Cricket World Cup-ah England-in Thawhlehni zan khan Pakistan wicket hnihin an hneh a, semifinal lut hmasa ber an ni. Three Lions hian Super 8-ah inelna thlengtu Sri Lanka an hneh tawh bawk a, match hnih an khel tawhah an la chak ve ve. Captain Harry Brook leh a hote hian February 27, Zirtawpni zan dar 7:00 hian New Zealand an hmachhawn leh ang.

Pallekele International Cricket Stadium, Balagolla-ah ṭhumvawra vannei Pakistan-in vuak hmasak an thlang. Shaheens tan opener Sahibzaba Farhan-a'n ball 45 lek aṭangin 63 runs a vaw chhuak mah se thlawptu a nei ṭha tawk lo. Chutihrualin Babar Azam (25), Fakhar Zaman (25) leh Shadab Khan (23) ten 20 runs an siam tling vek a, Pakistan-in over 20-ah 164/9 runs an siam.

England tan target har lutuk niin lang lo mah se ball hmasa berah Phil Salt a thi nghal a, Jos Buttler pawhin run hnih chauh a siam. Three Lions dinhmun a ṭha lo a, Pakistan-in chak beiseina an nei lian hman hle. Mahse, mamawh hun takah captain Brook-a'n ball 51 lek aṭangin 100 runs a siam a, Will Jacks-a'n 28 runs a belh bawk.

Brook-a'n century a siam hnuah pawh England nuam sain an la chak chuang lo a, Liam Dawson (1) leh Jofra Archer (5) a tawp an thleng hram. England hian over 19.1-ah 166/8 runs an siam a, wicket hnihin hnehna an chang. Nizan khan Sri Lanka leh New Zealand te an inkhel a, hnehna chang zawk tan semifinal kawng a inhawng zau dawn. Three Lions hnung zui turin New Zealand, Pakistan leh Sri Lanka ten beiseina an la nei vek.