Lewy-a'n Barca chhuahsan a hreh

Khawvela striker hmuhnawm leh ṭha ber pawl ni ṭhin Robert Lewandowski chuan a club khelh mekna Barcelona-ah contract thar ziah a beisei a, contract hlawhchhuah theih nan goal khung tum zat a inbituk niin an sawi!

Kum 37 mi Lewy hi a kum a tam ve deuh tawh avangin tun hma a phak tawh lo a, Major League Soccer club Chicago Fire chuan uluk zawkin an thlithlai mek nia sawi a ni - Saudi Arabia lam pawhin Lewy hi sum tam tak nena thlem luh theih an la inbeisei fan.

Polish journalist lar, Lewy ṭhian hnai tak Mateusz Borek chuan, "Robert hian tun hnaiah a khel ṭha tawk lo. Levante lakah khan minute 66 chiah a khel a, ball vawi 18 chiah a tawk fuh a, vawi hnih shot a nei bawk.

"Khelmual a chhuahsan khan Polish ṭawngin duhthawh takin a ṭawng a, Hansi Flick-a thutluknaah a lawm lo," a ti a, an ram striker ropui chuan khelmualah hun tam zawk hman a duh thu a sawi.

Borek chuan sawi zawmin, "Lewy pawh a rilru a buai ve hle. Chicago Fire hian hlawh ṭhahnem tak zawrhin an dawr mek a, Saudi Arabia lam pawh an inpeih hle tih a hria. Mahse, Lewy hian Catalan club-ah hian cham a duh a ni.

"A nupui hian Barcelona khawpuiah sumdawnna engemaw zat a kalpui tawh a, in thar an nei a, an faten nuam an ti em em bawk. A nihna takah chuan contract thar zawrh ni se, a duh ber ang," a ti a, Lewy chuan Nou Camp-ah cham a duh thu a sawi.

Lewy hian season hmasa khan Barca tan inelna hrang hrangah match 52 khelin goal 42 ngawt a la khung thei a, tun season-ah erawh match 31 aṭangin goal 13 chiah a la khung.

Borek chuan, "Lewy hian goal 10 a khung belh leh thei a nih chuan Barca-in contract thar an zawrh theiin a ring, niin an sawi," a ti ve leh chhawng - Barca hian league match 13 khelh an la bak a, Champions League-ah last 16 an lut tawh bawk. Lewy tan goal khung belhna hun a la awm nual niin a lang.