La Liga Real-in chak zo lo Barca an nih rual

Inrinni zan Catalan derby-ah Spanish La Liga mawngphah luahtu Espanyol-in hmahruaitu Barcelona an mikhual a, chak zawk awm loin 2-2 in an ṭin!

Barcelona hian Real Madrid chak thu hre chungin an khel a, heti chung hian hnehna an chang zo chuang lo - khawchhak tlangval Wu Lei an ngam lo a, point khatah lungawi a ṭul. Chinese forward hian minute 88-naah si phurh sut zawhna goal a khung a, minute 75-naa Frenkie de Jong hnawhchhuah a nih avanga kim loa khel Barca tan chhanletna hun a awm tawh lo. 

Inrinni zan inkhel hmasa lamah Real Madrid chuan 3-0 in Getafe an hneh a, defender Raphael Varane chuan goal hnih khungin Luka Modric chuan goal khat a thawh ve bawk - Barcelona leh Real hi an point hmuh zat a in ang mek. 

Inrinni zan inkhelh hmain Real Madrid-in point hnihin Barcelona an thlau a, ṭhenawm club Getafe lakah chak an mamawh tih an hria. 

Minute 34-na lekah Getafe goalkeeper David Soria a chesual a, Varane-a ball tauh chu hnekchhuah lo tum mah se anmahni lamah a ti lut ta zawk - French defender goal khungah pawm a ni. Varane hian a duhtawk mai lo. Toni Kroos-a free kick aṭanga ball kal chu minute 53-naah a tauh lut leh a, defender nichungin goal hnih a khung der!

Hun pek belh a ni a, chak tur a chiang tawh - mahse Modric chuan duhtawk mai loin Federico Valverde siamsak chu hun pek belh minute ruknaah a khung a, 3-0 in an chak.

Real an chak a, Barca-in Real chhuk en turin chak an mamawh tih an hria - mahse minute 23-naah goal chhuah hmasa zawkah an ṭang a, David Lopez chuan hmahruaina goal a tauh lut. 

Goal lutin Barca a beng harh zawk a, inkhel an thunun chhunzawm. Minute 50-naah Luis Suarez chuan si phurh sutna goal a rawn khung a, minute kua hnuah  Arturo Vidal chuan a belhchhah ve leh bawk. Barca-in hma an hruai zui avangin an chak mai rin a ni a, mahse rin angin thil a kal lo. Frenkie de Jong chu Jonathan Calleri laka a ball hloh chuh let a tumna lamah a foul a, a yellow card pahnihna a hmuh avangin hnawhchhuah a ni. 

Dutch rawlthar-in a career-a hnawhchhuah a tawh hmasak ber zanah Barca tan thil duhawm lo dang a thleng zui a, substitute Wu chuan minute 88-naah si phurh sutna goal a rawn khung - Chinese player zingah Barca laka goal khung thei hmasa ber record a siam. 

La Liga-a champion beisei ngam team zingah Atletico Madrid chuan hnehna an chang bawk a, an mikhual Levante chu 2-1 in an hneh - goal thum hi minute 18 chhunga lut vek a ni!

Wanda Metropolitano-a inkhelah Angel Correa chuan Kieran Trippier-a cross chu goal-ah chantirin minute 13-na lekah goal hmahruai a khung a, Roger Marti chuan minute thum hnuah Levante tan a sut. Mahse, minute hnih a liam awrh tihin Atletico hian Felipe Monteiro hmangin an khung leh a, Levante-in Enis Bardhi hmanga hun ṭha dang an neih chu Jan Oblak-a'n ṭha zeta a dan zui avangin 2-1 in Atletico an chak. Valencia pawhin season thara Champions League khelh beiseina an neih chu an chhi nung ve zel a, an mikhual Eibar chu Maxi Gomez goal khung hmangin 1-0 in an hneh.