Inter leh Juventus an chak zo lo!

Pathianni zan Serie A a hmuhnawm a, a ngaihnawm tel bawk - table chung lama inel ber Inter Milan leh Juventus an chak zo lo ve ve. 

Inter Milan hian an mikhual Cagliari chu 1-1 in an inhnehtawkpui a, Milan khaw club chak loh hre saa inlan Juventus chu Napoli lakah 2-1 in an tlawm bawk!

Lazio an bang bik lo - chak se Inter point hmuh zat ang hmu thei tur an ni a, mahse an mikhualna ramah AS Roma nen 1-1 in an inhnehtawk a, Serie A-ah team lian chak an awm lo tih chu a khaikhawmna awlsam a ni. 

Manchester United captain Ashley Young-a'n Old Trafford-a cham chhunzawm aiin Inter Milan pan a thlang zawk a, thlasik transfer-ah Italian club hi pound maktaduai 1.28-in a zawm. 

Kum 34 mi Young hi Antonio Conte-a'n right wing back-ah chhawrin Inter tana a match hmasa ber a khelhtir a, assist a nei nghal! Young hian Lautaro Martinez goal khung tur a siamsak a, Inter aṭanga Cagliari-a loan hmanga khel Radja Nainggolan chuan a club 'tak tak' zawk lakah an si phurh sutna goal a khung. 

Hun pek belhah Martinez hnawh chhuah zui a ni a, team pahnihin point an insem - Young tan erawh zan chhinchhiah tlak a ni a, United tana a match hnuhnung 31-a assist nei lo hian Inter tan match khatah assist a nei nghal!

Juventus manager Maurizio Sarri-a'n a hming chherna Napoli a pan a, mahse amah siam liantu club hian an coach hlui team-te hi 2-1 in an lo hneh - Inter chak loh vanga kal fal theihna remchang an neih an chan. 

Napoli tam Piotr Zielinski chuan goal hmahruai a khung a, hun tawp nan minute li chauh a awm tawh tihah Lorenzo Insigne chuan khung ve leh bawkin chak tur a chiang tawh.  Juve tan Ronaldo chuan hun pek belhah khung ve mah se si phurh sut zo turin hunin a daih tawh lo a, Napoli striker hlui Gonzalo Higuain-a bicycle kick chu Alex Meret chuan a lo dang bawk. 

Ronaldo hian Juve tan league match riat chhung chu a zawnin goal a khung ta a, Juventus tana kum 2005-a David Trezeguet-a'n league match riat chhung a zawna goal a khung hnua Juve player zinga he record nihrual leh thei hmasa ber a ni. 

Pathianni zan Serie A inkhel dangah Lazio-in AS Roma hneh se chuan Inter nen an point hmuh zat a in ang ang a, match thum lekin Juve an thlau ang. 

Mahse, Lazio-in an mikhualna ramah Roma chu 1-1 in an inhnehtawkpui a, Roma tan season thara Champions League khelh beiseina a nung ve 

zel thung. Roma tan Edin Dzeko chuan minute 26-naah goal hmahruai khungin a la class reng tih a pholang a, Lazio hian minute 34-naah Francesco Acerbi hmangin an chhanglet a, 1-1 in an ṭin.