Lakers ngam loh Banchero' Magic

NBA regular season khelh mekah nimin zing khan Los Angeles Lakers chuan 110-109 in Orlando Magic an ngam lo a, Magic forward Paolo Banchero a langsar a, Lakers player ten an ngam lo hle.

Crypto.com Arena, Los Angeles-a inkhelah Magic tan Banchero-a'n point 36 score-in a score sang ber a, assist 11 nei bawkin double double a siam a, block vawi ruk ngawt a nei bawk a, Magic innghahna ber a ni.

Kum 24 mi Banchero bakah hian Desmond Bane (22), Wenderll Carter Jr. (20) leh Tristian da Silva (13) ten Magic chak nan an thawhhlawk bawk.

Lakers tan Luka Doncic a langsar a, Slovenian point guard hian point 22 score-in assist 15 zet a nei a, Lakers player zingah point leh assist a ngah ber.

Doncic bakah Deandre Ayton (21), LeBron James (21) leh Austin Reaves (18) te khel ṭhain team tan ṭangkai viau mah se an vanduai ṭum an tawng a, point khat lekin Magic an hneh lo.

Lakers hian 58 khel tawhin vawi 34 an chak tawh a, vawi 23 an tlawm tawh bawk. Western Conference table-ah paruknaah an awm a, an dinhmun hi him rih mah se an inthlahdah chuan playoff khel phak lo thei reng an ni.