Red Bull ka chhuahsan chhan Verstappen a ni lo - Horner

Red Bull team principal hlui Christian Horner chuan Red Bull a chhuahsan chhanah Max Verstappen a tel loh thu a sawi.

Max Verstappen-a pa Joe chuan Horner hi 'inlaichinna tichhetu' tiin Red Bull a chhuahsan hma khan a lo sawi tawh a, hei vang hian Horner chhuah chhan hi Red Bull-in Verstappen inremna thar ziahpui an tum vang nia sawi a tam hle.

Horner chuan,"Joe Verstappen nen kan inkawm ngeih hran lo, ani ngei pawhin a pha lo ang, mahse chu chu Red Bull ka chhuahsan chhan a ni lo," tiin Netflix's Formula 1-in Drive to Survive, Zirtawpnia release-ah a sawi. Hei hi Horner-a'n Red Bull a chhuahsan hnuah mipui hriata thil a sawi vawi khatna a ni

Kum 52 mi Horner hi 2005 aṭanga 2025 chhung khan F1- a Red Bull team principal leh CEO a ni a, kum 2010 leh 2013 inkarah World Constructors' Championship title paruk lai a lakpui.

February 2024 khan Horner hian hmingchhiatna a nei zeuh a, Red Bull-a an hmeichhe hnathawk pakhatin mipat hmeichhiatna rawngkaia chhiah nawmnah angin a puh a, hei vang hian thla 18 chhung chawlhtir a lo ni tawh.

An puhna hi a khinlet hnuah zangnadawmna atan pound maktaduai 52 pein Red Bull a chhuahsan a, Horner hi a chhuah danah a lungawilo a, Red Bull managing director Oliver Mintzlaff leh advisor Marko Helmut te chu a chhuah chhanah a puh.