Sports Minister-in EMS Online Application a tlangzarh

Empowering Mizoram Sports hnuaia training/coaching dil duhten mobile phone hmanga awlsam zawka dilna an theh luh theihna tura duan EMS website ‘ems.mizoram.gov.in’ chu nimin khan Sports & Youth Services minister Lalnghinglova Hmarin a tlangzarh.

Tlangzarhna inkhawm hi Minister Office Chamber-ah buatsaih a ni a, Sports & Youth Services Department leh Mizoram State Sports Council hotute leh mi pawimawh dangte he hunah hian an tel a ni.

Vision 2036 Olympic

Empowering Mizoram Sports hi January 14, 2025 khan chief minister Lalduhoma'n a tlangzarh a, EMS kalpuina tur hi 'The Mizoram Bana Kaih (Hand holding) Scheme' hnuaia 'Participative Planning and Innovations for Sustainable Development' component ṭtangin Rs. 2,50,00,000/- (Rupees two crore and fifty lakhs) sanction tawh a ni.

Vision 2036 Olympic thlir tel chunga EMS hi duan a ni a, hemi a nih avang hian Mizote mil sports discipline an thlan chhuak. Infiamna ngaih pawimawh tur pairiatte chu archery, judo, boxing, hockey, badminton, taekwondo, weightlifting leh wrestling te an ni.

EMS hnuaiah hian Mizoram hmun hrang hrangah naupang kum 8 - 15 inkarte chu basic coaching pek an ni dawn a, coaching hi ni 15 chhung atan niin, nitin darkar thum, a vaiin darkar 45 pek an ni dawn.

Kum 8-15 inkar ngaih pawimawh an nih chhan hi, kum 2036-a taksa leh rilru ṭhat vanglai thleng tur 'age group' an nih vang a ni. EMS hi Public-Private-Partnership (PPP) mode-a kalpui tur a ni a, sorkarin coach-te leh an hlawh bakah sports equipment a tum ang.

Website leh hmalakna

Nimin lama tlangzarh EMS website https:/ems.mizoram.gov.in hi awlsam zawka training/coaching duh tana dil theihna a ni. Website-ah hian mahni khua/veng, district hming leh RD Block chhutluhna a awm a, biakrawn ber tur hming leh biak pawh tur dah vek a ni bawk.

Hrechiang duh tan phone no. 8132098626 dah a ni a, EMS hnuaia coaching/training petu turte hi State-level Sports Association te nen ṭangkawpa thlan a ni. Sports Minister Lalnghinglova Hmar chuan, "EMS chu Mizo thalaite’n infiamna lama hma kan sawn theihna tur leh kum 2036-a India-in Olympic Games a thlen tura Mizo ṭhalai tam lehzual an lan theihna tura sokrar hma lakna pawimawh a ni.

"Mizoram pum tuam chhuak sports coaching leh talent haichhuahna lian tham kalpui tum a ni a, hmun kilkhawr zawka naupang kum 8 – 15 inkar talent nei ṭha tak tak, training mumal dawng si lote chu zawn chhuah a, an bana kaih a, Mizoram leh India aiawh thei tura chher chhuah tum a ni," tiin EMS chungchang a sawifiah.

EMS atan hian inbuatsaihna thui tak neih a ni tawh a, December 1, 2025 khan home minister K. Sapdanga hoin Ramhlun Indoor Stadium-ah Kick-off hun hman a ni. Nikum December vek hian ‘Trainers Training’ buatsaih a ni a, JICA India nen tangkawpin Hawla Indoor Stadium-ah ‘Coach Development Programme’ buatsaih a ni bawk.

Nippon Sports Science University, Tokyo aṭangin sports coaching a mi thiam bik, Professor Masumitsu Ito leh a thawhpuiten Mizo coach 40-te zirtirna an pe. Naupang chhertu tur coach-te chher hriam hna ṭan a ni tawh a, nimin khan mi tam lehzualin an hlawkpui theihna turin online-a coach dil theihna EMS website chu hawn a ni.