Neymar chungchangah Ancelotti a nghing lo

Brazil national team coach Carlo Ancelotti chuan mipui pressure vang ringawta Neymar koh tumna a nei lo a, Barcelona forward hlui hi World Cup hmachhawn tura a taksa a inpeih tawka a ngai a nih loh chuan koh a tum lo.

Neymar hian tun hnaiah an ram tan World Cup khelh a duh thu a sawi chhuak zeuh zeuh a, a club khelh mekna Santos-a a contract zawh rual, December 2026-a inkhelh chawlhsan thu thlengin a sawi chhuak.

Hetiang a nih avang hian Brazil mipuite chuan an fapa duat rawn hian a career ropui tak thlah nan World Cup khel ve leh hram se an duh a, Ancelotti erawh Neymar-a chungchangah a ngaihdan a thlak lo.

Brazil hian March thla tawp lamah France leh Croatia hmachhawnin friendly match an khel dawn a, hei hi World Cup atana an inpuahchahna hnuhnung ber tur a ni. Mahse, he match hnihah pawh hian Ancelotti chuan Neymar hi koh a tum lo!

Neymar hi hliamin a tlakbuak reng avangin, a nih tur ang ni phak lo nia sawi a ni a, Santos-a a kir hnuah pawh ropui taka khelh chang nei mah se, hliam vangin khelmual pawn lamah hun a hmang tam zawk em ni chu aw, tih mai tur a ni.

Hetiang boruak karah hian Ancelotti chuan Neymar hi World Cup-a inlan tura a ko dawn a nih chuan 100% ni se a duh a, a taksa a inpeih ṭha tawk a nih loh chuan tunlai khawvela game physical tak khelh ṭhinaah hruai chiah a ngai lo.

Neymar hian kum 2014 khan Brazil tana a World Cup hmasa ber khelin, 2018 leh 2022-ah te a inlan bawk a, a vawi li nana khawvel ennawm ropui bera inlan leh hram a duh - Brazil mipui lam pawhin an fapa rangkachak hi World Cup-a hmuh leh ngei an inbeisei.

Mahse, Ancelotti-a'n mipui duh leh lar ringawt koh a tum lo a, Neymar tan February leh March thla vela a khelh chhoh dan a pawimawh dawn tihna a ni ber.

Kum 34 mi Neynmar hian ram tan match 128 khelin goal 79 a khung a, Brazil tana goal khung hnem ber a ni. Mahse, October 2023 hnuah khan ram tan a inlan leh tawh lo.