Griezmann chungchangah Simeone a ṭawng chhuak

Atletico Madrid boss Diego Simeone chuan tun hnaia chhuak tur anga sawi thawm awm reng , a veteran forward Antoine Griezmann chungchangah thuthar a nei a, Argentine coach chuan, "A tana ṭha ber tur a thlan ka beisei," a ti.

Kum 34 mi Griezmann hian Atletico Madrid-ah kum 2027 thleng contract a la nei a, mahse, tun nipui transfer rual hian a chhuah mai tawh rinna a lian hle - Major League Soccer club Orlando City nen sawi zawm mek a ni.

Hetiang boruak karah hian Simeone a ṭawng chhuak a, French forward hi a chhuah loh tur thu a sawi loh avangin nipuiah chuan a chhuak ngei dawn niin a lang.

Argentine coach chuan, "A tana ṭha ber tura thutlukna a siam ka beisei a, a duh ang takin thutlukna a siam turah ka ngai - a duh ang tak club zawm a phu a ni," a ti a, a player chelh lam thu a sawi lo.

Griezmann hian USA-a kal hi a chak nia sawi a ni a, US nunphung tem ve a chak - France international hlui hi basketball pawh ngaina tak niin, NBA pawh a hmunah a lo en fo tawh ṭhin.

A kum tam ve deuh tawh mah se, Orlando tan pawh player lakluh chakawm tak a la ni reng tho - tun season inelna hrang hrangah Griezmann hian match 32 khelin goal 12 a khung tawh a, assist vawi hnih a nei tel bawk.

Lionel Messi leh Son Heung-min te khelhna MLS lamah Griezmann hi a kal a nih chuan US-a top flight league hian ngaihven a hlawh phah lehzual ngei a rinawm.