Kane-a'n Barca zawm a hreh lo?

Barcelona presidential candidate Xavi Vilajoana camp lam chuan Catalan club hotu ni tura an campaign-na lamah Harry Kane hming an lam ri a, Bayern Munich forward chuan Nou Camp pana a puanthuah tel a hreh loh thu an sawi.

Kane hian Allianz Arena-ah kum 2027 thleng khel turin contract a nei mek a, mahse, contract thar chungchangah German club nen hian inbiakna nei tawh mah se, he thu buatsaih a nih thleng hian inremna mumal tak an la nei lo.

Vilajoana chuan, "Kane hi en ila, kan club khelh dan nen pawha inmil tak centre forward-ah kei chuan ka ngai a ni. Striker a ni mai lo a, a khelhpuite nena 'link' turin hnung lamah pawh a tawlh let fo ṭhin.

"Amah hi number 9 dik tak, finisher ṭha em em a ni tel bawk. Khelmuala tlan tam tak player a ni a, tlarhnung aṭanga game siam a ngaih pawhin a tithei viau zel. Barcelona-ah la lut ngat ila chuan, team tan danglamna nasa tak a thlen thei ang," a ti.

Vilajoana campaign manager Jordi Codina pawhin Kane chuan Barca zawm a chak a ruin thu sawiin, "Kane hi kan thawhpuite kaltlangin kan be pawp tawh a, kan ngaihdan chuan Barcelona zawm hi a duh kan ring. A nihna takah chuan player tam zawk hi Barca-in bia ila, Barca pan an duh ang chu," a ti a, an club a dah sang hle.

Kum 32 mi Kane hi Bayern tan a vul hle. Tun season inelna hrang hrangah German club tan hian match 36 khel tawhin goal 43 ngawt a khung leh der tawh a, Barcelona President thar thlanna tur atana campaign au hla hiala hman a ni hi a mak hran lo - Barca President thar hi March 15-ah thlan a ni ang.