Team huaisen Juve an tling zo lo
Nilaini zan UCL last 16 playoff khelhah Juventus chuan 3-2 in Galatasaray hneh mah se, first leg-ah goal an chhuah hnem an tuar a, aggregate-ah 7-5 in an chak lo.
Juventus tan Manuel Locatelli, Federico Gatti leh Weston McKennie ten goal khat ṭheuh an khung a, Galatasaray tan Vicor Osimhen leh Baris Alper Yilmaz ten extra time-ah goal an khung.
Allianz stadium-a inkhelah team pahnihte an inhnehtawk a, chance pawh an inneih chhawk zak zak. Mikhual team tan Osimhen-a'n chance a nei hmasa zawk. Juve tan Locatelli leh Francisco Conceicao ten chance an nei a, an chance neih an hmang ṭangkai thei lo thung.
Juve an vanduai reng lo a, minute 37-naah Khéphren Thuram-a penalty hlawhchhuah chu Locatelli-a'n pet goal-in an hmahruaina goal a khung a, hmahruai chungin Juve-in chawlhlawk an hmang.
Second half-ah Juventus an phur a, mahse beisei angin thil a kal lo. Ṭan aṭanga minute thumna lekah Juve defender Lloyd Kelly-a'n ball kang an inchuhna lamah Yilmaz ke a rap a, referee-in yellow card pahnihna a pek zet hnuah direct red card a pe ta zawk a, hnawhchhuah a ni.
Kim loa an khelh hnuah Juventus an zam phah lo a, a nawrtu zawkah an ṭang. An huaisen rah an hmu a, minute 70-naah Gatti-a'n hnai tak aṭangin an goal hnihna a khung. Minute 82-naah McKennie-a'n Turin club tan a tauh lut a, first leg nen chhiarkawpin an inhnehtawk chiah a, Juventus fan te thawm a ring hle.
Extra time khelh a nih hnuah Luciano Spaletti naute phur thar a, mahse a tlem zawk an nihna a lang a, extra time first half hun pek belhah Osimhen-a'n a pet goal a, minute 119-naah Yilmaz-a'n khung belh ve lehin an mikhualna ramah Galatasaray in hnehna an chang a, huaisen takin Juve-in nawr mah se an ṭang tluan thei ngang lo a, an result pawm thiam bak tih theih an nei lo.
Spaletti naute hi an chak loh avanga hnual hman an ni lo a, Pathianni zanah Roma an lehchilh dawn a, Roma hi an chung chiahah awmin point liin an phak lo mek. Season tharah Champions League khelh nawn an duh a nih chuan Roma an hneh a ngai a, thildang ngaihtuah hman an ni lo.