Manolo-a'n Ayush a fak

FC Goa coach Manolo Marquez chuan a player pawimawh, Dinthar tlangval Ayush Chhetri a fak a, Spanish coach chuan, "Ani ang player hi chu an rilru puthmang a dik avangin enkawl an nuam hle," a ti a, Ayush a fak hnua an inkhel hmasa berah an chak zui.

Goan club hian Ningani zan khan Indian Super League match khelin, an mikhual Sporting Club Delhi chu 1-0 in an hneh a, Dejan Drazic chuan inkhela goal awmchhun a khung.

Goan club-in match thum an khelh tawhah tlawm an la nei lo. An match hmasa berah Inter Kashi chu 1-1 in inhnehtawkpui mah se, Mohammedan Sporting Club leh SC Delhi lakah a zawnin an chak a, champion ngei tumin kawng dik an zawh zel.

FC Goa tan ṭum dang ang thoin Ayush chuan inkhel bul a ṭan a, Dinthar tlangval hian FC Goa tan match 79 ngawt a khel tling ta - tuna Goa player zingah heti zat match khel thei dang an awm lo.

Aizawl FC midfielder hlui hian ISL-a a season hmasa berah khan league match 20 a khel nghal a, Carlos Pena enkawlna hnuaiah a ni. Pena chhuah hnuah beisei angin hmun chang zui lo mah se, season hmasa aṭang khan Manolo-a'n a ring lehzual.

Goa coach Manolo chuan, "Pena hnuaiah khan Ayush hi a khel hnem hle a, mahse, a season hnihna erawh a tan thil harsa tak a ni zui. Rowllin Borges, Raynier Fernandes leh Carl McHugh te kan la lut a, midfield kha a khat ṭha hle.

"Mahse, theihtawp a chhuah chhunzawm a, tunah chuan kan player pawimawh tak a ni ta. A thawkrim a ni mai lo a, a inngaitlawm em em reng. Squad-a mi zawng zawng hian an ngaina emaw tih mai tur a ni a, ani ang player hi chu an rilru puthmang a dik avangin enkawl an nuam hle.

"Ayush chauh a ni lo, amah ang player tam tak kan nei a, training neih pui an nuam ṭhin hle," a ti a, a player chu a fak hle.

Ningani zan inkhelah hian Goa tan Daniel Lalhlimpuia chu bench aṭangin a lut bawk a, SC Delhi lamah Augustine Lalrochana chuan inkhel bul ṭanin, Ramhlunchhunga chu bench aṭangin a lut bawk.