Wirtz la inlan thei dawn lo

Liverpool coach Arne Slot chuan a player Florian Wirtz dam hun tur a sawi theih loh thu a sawi a, zanin dar 8:30-a West Ham an mikhual hunah German attacking midfielder hi a la inlan thei dawn lo chiang.

Slot chuan, "Jeremie Frimpong-a'n kan zingah training a nei leh tawh a, a inkhel thei ang. Hetihrual hian Wirtz erawh kan zinga awm turin ka beisei thei lo a, pawi ka ti hle.

"Engtikah nge Wirtz hi a lo kir dawn, tih pawh ka sawi thei lo. Ṭum danga player lo kir hun tur ka hriat loh thu ka sawi hi chuan, hre reng chunga ka zep duh vang a ni ṭhin.

"Mahse, tun ṭumah erawh ka hre lo tak tak a ni," a ti a, a player dam hun tur a la chiang lo. Wirtz hian beiseina sang tak nen Liverpool a zawm a, season ṭantirah beisei phak lo mah se, tun hnaiah a khel ṭha ṭhin hle.

Wirtz hian inelna hrang hrangah Liverpool tan match 35 khel tawhin, goal ruk a khung tawh a, assist vawi riat a nei bawk - tun season-a beisei phak lo Liverpool tan Wirtz chhawr theih loh hi chânna a tling.

Hemi chungchang hi Slot pawhin sawi chhuak lehin, "Bundesliga aṭanga insawnin, Premier League-ah Liverpool tan a inlan a, hmasawn a ngai a, theihtawp chhuah a ngai - chuti chunga khati chen 'fit' taka a khel thei kha a lawmawm zawk a ni.

"Kha khan a rilru paukhauhzia leh a thawhrimna a pholangin ka hria. Tunah hliamin a tlakbuak ta a, tun hnaia a khelh ṭhat em avangin amah leh team tan a inlan thei lo tur hi a pawi hle," a ti.

Wirtz hi kar hmasaa Nottingham Forest nen an inkhelh hmain warm-up na lamah a inhliam a, a hnungzang na a ti, niin an sawi. Forest lakah Reds hi 1-0 in an chak hram a, an goal khung hi hun pek belh minute sarihnaa Alexis Mac Allister-a khung a ni.

Reds hi Premier League table-ah parukna an ni mek a, match 11 chauh khelh tur awm tawhah point thumin palina Manchester United chu an phak lo mek. Reds tan tlawm a thiang tawh lo a, hetihrual hian zanin dar 8:30-a an mikhual tur West Ham hi tlak hlau an ni a, Liverpool tan hna a awlsam lo ang.