Silly Point: Aw Eden Parmawi, ka tan vul leh rawh!
Ranji Trophy final hmuhnawm takah rinkai loh zawk leh mikhual Jammu & Kashmir lamin India cricket palian Karnataka chu an tualzawlah an tuk zal dawn a ang riau a, Mizoram Cricket pawh sixth gear-in a kal chur chur reng bawk.
Chumi karah T20 World Cup Super 8 hmuhnawm leh ngaihnawm tak mai lo awm bawk nen, tunlai chu cricket kan hawp bawk a, kan chawm bawk a ni ber mai.
Ka thlarau tho la
Thlengtu branch pakhat zawk Sri Lanka-in min peih loh san ta a, New Zealand leh England ten semifinal ticket an book fel thawkhat ta. Group 1 lamah thlengtu branch tho Hamara Desh te South Africa laka mualpho namen lo a, an mualpho hnuin, an ṭhangharh.
Men in Blue hian Zimbabwe chu hneh satliah mai ni loin a sawp a, an sawp a ngai a. A ni, an sawp chiang a, tournament a nung leh ta sawt mai. India tan beisei tur a awm leh ta.
Bihchianna
Zimbabwe-in run rate ṭha mamawh India an tum tih hre ranin India an vuak hmasak tir a. Mahse thuthlukna fuh lutuk lo a ni. Run umtu a tan hian run rate mamawh zat hre rana khelh chu a awl zawk nameuh mai, mahse India opener Ishan Kishan leh Sanju Samson ten top gear in bul an ṭan nghal.
Over 10 a zawh meuh kha chuan India tan one way traffic a ni ber tawh a, Zimbabwe tan letna hun remchang a awm meuh tawh lo. Tin, Zimbabwe tihsual lian tak chu an finger spinner (kutzung hmanga ball ṭhuai) te an hmang lo kha ni. India batsman record kan en chuan, finger spinner laka an chetdan hi tun hnaiah hian a chhuanawm lutuk lem loh.
Quarterfinal chu
Tun Chawlhni a lo thleng anga, Kolkata-a cricket stadium hmingthang Eden Gardens, chheh velah zingkar aṭangin stadium lamah mipui an kat nuk tawh a nih pawhin thil mak a ni lo ang. A chhan chu inkhel hmuhnawm leh pawimawh en tur a awm dawn tlat.
Group 1-ah India leh West Indies te point hmuh zat a inang chiah a, Eden Gardens-ah an inhel nuai dawn. A chak zawk zawkin semifinal an lut dawn a, a chak lo zawkin bedding an tel a ṭul ang.
India batting line up hian mumal taka in rem an la nei hleithei lo a, inkhel tin deuh thaw an position an la siksawi. T20 khel thiam Windies lamah inenchhin a fuh chiah tawh dawn lo a, an chian a ngai tawh. Rinkai zawk hriathiam an har a, nomawi humhim tum champion lai West Indies nge mahni rama sakei koham India tih a ni tawp ta mai awm e.
Aw Eden , he Chawlhni hian i par rawn chhuah mawlh ang che.
