Nottingham-in Europa last 16 an lut

Manager thar hnuaia khel Nottingham Forest chuan harhtharna an chang a, Ningani zan khan Fenerbahce lakah 2-1 in chak lo mah se, first leg-ah 3-0 a hnehna an chan avangin aggregate-ah 4-2 in an chak a, Europa League last 16 khel turin an inpetkai.

Fenerbahce tan Kerem Akturkoglu-a'n goal hnih a khung a, a team beiseina siamsak mah se Forest tan Callum Hudson Odoi-a'n goal khat khungin an beiseina a tihtawpsak.

Inkhel chu

City Ground-a inkhelah mualneitu Forest an hlauhawm nghal a, Elliot Anderson chuan hnai tak aṭangin a hlah a, Manchester United hel lai Anderson hian Fenerbahce winger Nene Dorgeles mawi taka a bum hnuah goal-ah a pet a, goal line-ah an lo pet chhuak hman hlauh. Forest forward Lorenzo Lucca-a'n a hun ṭha neih a chhawr ṭangkai thei lo bawk.

Forest-in goal hmaa an hriam loh laiin Fenerbahce an hriam thung a, minute 22-naah counter attack aṭangin an vaw let a, Sidiki Cherif-a ball pass ṭha tak chu Neco Williams-a'n a dan zawh loh hnuah Akturkoglu-a'n chiang takin a pet goal a, mikhual team-in hma an hruai.

Team pahnihte an khel a nung a, last 16 luh tumin theihtawp an chhuah. Innawr tawn chhunzawm mah se goal hmaah an hriam tawk lo a, goal dang lut loin chawlhlawk an hmang.

Second half ṭan aṭanga minute khat pawh a ral hmain Forest-in penalty an chawi. Defender Jair Cunha-a'n Akturkoglu a tihtluk avangin referee-in penalty a pe a, penalty hlawhchhuaktu Akturkoglu-a'n khung lehnghalin an hmahruaina a belhchhah. Turkish club-in goal khat chiah an mamawh tawh avangin an phur hle.

Mualneitu an insiamṭha a, goal an chhuah belh hnuah Jair Cunha, Nicolás Domínguez, Hudson Odoi leh William te hmangin chance nei a, a hmawr an bawk fuh thei lo.

Forest an vanduai reng bik lo a minute 68-naah Hudson Odoi a inlar a, Ola Aina cross chu Nelson Semedo a paltlang hnuah goal kilah tak a pet lut a, an siphurh a sut ṭhen bakah aggregate-ah 4-2 in a team hma a hruaipui.

Goal an khung hnuah Forest an hlauhawm chhunzawm a, goal khungtu Hudson Odoi leh Omari Hutchinson ten chance nei mah se Fenerbahce keeper Ederson an paltlang thei lo. Goal dang lut tawh loin hun a tawp zui a, Forest-in round of 16 an lut.

An harh hlen dawn em?

Tun season-ah Nottingham Forest-in manager pali lai an hrawn tawh a, Sean Dyche hnuaiah club lian ngam nghal mah se an hlimnain rei a daih lo a, result ṭha a neihpui chhunzawm theih loh avangin ni 114 hnuah ban leh a ni.

Sean Dyche thlak nan Vitor Pereira an lalut a, Portuguese manager hi Wolves-in an ban hlim a nih avangin beisei a sang lo. Mahse a match hmasa berah Fenerbahce chu 3-0 in khualmualah hnehna a chanpui nghal a, Premier League lamah Liverpool hmachhawn nghalin, hnehna chanpui zo lo mah se an khelh danin mipui a tilungawi.

Reds lakah Forest hi an bet reng lo a, a nawrtu zawkah ṭangin goal attempt pawh an ngah zawk. Second leg-a Fenerbahce an hmachhawn pawh hian inkhel an thunun a, an vanneih zan ni se goal tam zawk khung thei tur an ni.

Forest hian Pathianni zanah Brighton & Hove Albion an lenchilh dawn a, Premier League-a inhamtan zel an duh chuan Vitor Pereira naute an chesual thiang tawh lo.