Dortmund-in Bayern chelh tum dawn

Bundesliga-ah inkhel ropui hmuh tur a awm dawn a, hmahruaitu Bayern Munich chu anmahni hnaih bertu Borussia Dortmund-in chelh an lo tum dawn a, zanin dar 11:00-ah Der Klassiker en turin football ngainatute Signal Iduna park lam an hawi ang.

Tun season-ah Bayern an khel ṭha a, match 18 chhung tlawm nei loin an kal hman. Mahse January 24 khan 2-1 in Augsburg an hneh lo a, tun season-a an tlawm vawi khatna a ni.

Augsburg an hneh loh hnuah Bayern hian Hamburg an inhnehtawkpui leh a, Dortmund nen an inthlauhna point ruk chauh a nih hman avangin Krismas boruak an zo lo niin mi tam takin an ngai hman.

Mahse Vincent Kompany naute hi an insiamṭha leh tawh a, Dortmund an chetsual ve zeuh avangin point riatin hma an hruai leh tawh. Bavarians tan Harry Kane a khel ṭha a, kum 32 mi Kane hian Bundesliga-ah goal 28 khung tawhin amah hnaih bertu a teammate Luis Diaz aiin a letin a khung tam zawk.

English forward Kane hi a chet ṭhat avangin Bayern pawhin thlung ngeh an tum a, Barcelona inthlanah a hming ri bawkin an campaign-na hmanraw pakhat a ni a, Kane hian Nou Camp lamah a puanthuah tel a hreh lo nia sawi a awm bawk.

Kane thlawp turin Luis Diaz, Michael Olise leh Serge Gnabry te an awm a, Europe-a forward hlauhawm berte an ni. Anni bakah hian rawlthar duhawm Lennart Karl a awm a, Jamal Musiala a dam leh tawh bawk avangin Vincent Kompany naute an ṭhat dan berin an inlan dawn.

Hetihlai hian Dortmund hi Champions League aṭanga tla hlim an ni a, Atalanta an inlehthal tir avangin UCL an mangṭha. German Cup-ah an tlak tawh bawk avangin Bundesliga-ah chiah Dortmund-in beisei tur an nei tawh.

Dortmund tan Serhou Guirassy leh Maximilian Beier te an inngahna an ni leh dawn a, Guirassy hian goal 11 khung tawhin Beier hian goal sarih a khung tawh bawk. Dortmund hi Bayern nen an inkar tihzim theihna hun remchang hman ṭangkai an tum a, hneh an tum a nih chuan player pahnihte hi an chet ṭhat a ngai ang