Eng team pawh tum turin kan inpeih - Luis Enrique

Paris Saint Germain manager Luis Enrique chuan Champions League-a an tum turte a vau a, eng team mah an hlauh loh thu a sawi. Nilaini zan khan PSG hian Monaco pet chhuakin UCL last 16 an lut a, Last 16 lut turin vanneihna mamawh mahse an manager Luis Enrique a hlauthawng lo.

Spanish manager chuan,"Khelhpui kan har em em a, in duh chuan kan khingpuite in zawt thei ang. Eng team pawh hmachhawn turin kan inpeih a, eng inelna pawh khel turin kan ṭha tawk.

Player inhliam kan neih reng avangin season dang aiin a har deuh a, chhuanlama hman erawh ka duh lo. Mahse player te dam kim hi a pawimawh a, an in fit hunah kan ṭha sawt ang," a ti.

PSG hian zanin dar 1:35-ah Le Havre an lenchilh dawn a, an thiampuipa Ousmane Dembele a inkhelh a rinawm loh. Nizan khan anmahni hnaih bertu RC Lens leh Strasbourg an inhmachhawn a, an result kan hre hman lo.

Lens leh PSG hi point hnih chauhin an inthlau a, vawi khat chetsual zeuhin an dinhmun a thlak thei a, champion nawn an tum a nih chuan PSG tan chetsual a thiang lo.