Lakers chak lo leh tawh

Los Angeles Lakers chuan nimin zing khan 113-110 in Phoenix Suns an hneh lo a, an match hnuhnung pathumah an tlawm vek.

PHX Arena, Phoenix-a inkhelah Suns tan Grayson Allen-a'n point 28 a score a, Suns player zingah a score hnem ber. Allen bakah Collin Gillespie (21) leh Royce O'Neale (13) ten Suns chak nan an thawh hlawk hle.

Suns hian chak turin vanneihna an mamawh a, hun tawp dawna O'Neale-a three point in hnehna a chantir a, second khat pawh a awm tlin tawh loh avangin Lakers tan tih theih a awm tawh lo.

Lakers tan Luka Doncic-a'n point 41 score-in inkhel zingah a score sang ber a, rebound leh assist pariat nei bawkin a langsar hle.

Slovenian point guard bakah LeBron James (15), Austin Reaves (14) leh Jake LaRavia (11), te khel ṭha viau mah se an vanduai ṭum an tawng a, point thum lekin Suns lakah an chak zo lo.

Western Conference table-ah Lakers hi paruknaah an awm a, vawi 34 hnehna changin vawi 26 an tlawm tawh a, match khelh tur a la tam avangin an in thlahdah chuan playoff khel pha lo thei reng an ni.