East Bengal tan Edmund-a goal a tawk lo

28th February, 2026

Nizan Indian Super League inkhelah East Bengal tan Edmund Lalrindika'n goal khung mah se, a team chakpui nan a tawk zo lo a, Jamshedpur FC lakah 2-1 in an tlawm.

Salt Lake Stadium-a inkhelah season duhawm tak hmangtu Emdund-a a langsar leh pek. Lunglei tlangval hian minute 40-naah amah vengtu duhthala a bum hnuin goal-ah a khung a, 1-0 a ni.

Kolkata club-in match thum an khelh tawhah Edmund hian goal a la thawk chhuak vek! NorthEast United laka 3-0 a an chak ṭumin assist a nei a, Sporting Club Delhi lakah goal a khung bakah, assist a nei bawk.

Zirtawpni zanah pawh Edmund-a'n a class pholangin, goal a khung leh ta a, mahse, Mizo tlangval chet ṭhat hi Kolkata club tan a tawk lo - Stephen Eze leh Rei Tachikawa ten Jamshedpur tan an khung a, an chak daih.

East Bengal tan Edmund-a bakah Lalchungnunga chuan inkhel bul a ṭan a, bench aṭangin David Lalhlansang a a lut bawk. Mahse, Kolkata club-in match thum an khelha chak vek an tumna a thamral a, an khawtualah ngei Jamshedpur an ngam lo.

JFC tan erawh match thum an khelha vawi thum an chakna chiah a ni a, Men of Steel tan hian East Bengal aṭanga an lakluh Mark Zothanpuia chuan minute 90 a khel tluan.

Nizan ISL inkhel hnuhnung zawkah Bengaluru FC leh Punjab FC inkhelin, an result kan hre hman lo. Vawiin tlai dar 5:00 hian Freddy Lallawmawma leh R. Lalthanmawia telna Kerala Blasters leh Inter Kashi an inkhel ang a, zan dar 7:30-ah Lalengmawia Ralte (Apuia) awmna Mohun Bagan leh Mizo pariat kawltu Mohammedan SC an inkhel ang.

Pathianni tlai dar 5:00-ah Isak Vanlalruatfela, K. Lalṭhathanga (Puitea), Lalrinfela Khiangte leh Jeremy Zohminghlua te awmna Odisha-in Chennaiyin an mikhual dawn a, Chennai club hian Lalrinliana Hnamte (Terina), Laldinliana Renthlei leh PC Laldinpuia te an kawl thung.

Pathianni zan dar 7:30-ah Lallianzuala Chhangte, Hmingthanmawia Ralte (Valpuia), defender Lalnuntluanga Bawitlung leh Zothanpuia te neitu Mumbai City leh NorthEast United an inkhel ang - Highlander hian Lalrinzuala Hauhnar, Lalbiakdika leh Fredy Chawngthansanga te an nei.