Indian Football League : Chanmari FC bul ṭan danah lawmna tur a tam
RG Stadium-a Indian Football League match hmasa berah MPL champion Chanmari FC leh Gokulam Kerala te goal awm loin an inhnehtawk. Inelna ṭan hun chian lawk loh vanga khelmual chhung leh pawna inbuatsaihna duhthusam a ni pha lo chungin entu mipui sang chuang an pung khawm a, inkhel a hmuhnawm tel bawk.
I League tia hriat lar ṭhin chu tun season aṭangin Indian Football League tih a ni a, club lamin inelna buatsaih nan sum an sen nasat bawk avangin kum dang aiin a changtlung hret. RG Stadium sirah pawh 'big screen' hmangin scoreboard dah a ni.
Mizo hlang
Chanmari coach Victor Lalbiakmawia'n Brazilian striker Jota leh Manipur midfielder ṭha Christopher Kamei te a kawl chungin Mizo hlangin bul an ṭan. Chanmarians hian I League-a tawnhriat nei tawh keeper Zothanmawia leh midfielder C. Lalmuanpuia an kawl a, ISL-a tawnhriat nei Lalhmangaihsanga leh Aron Vanlalrinchhana te awm bawk mah se player dang tan erawh thil thar a ni.
Mizo club-in Mizo player-te hmakhua ngaiin harsa ti tak chungin Indian Football League an khel a, inelna hmachhawn tur hian participation fee-ah ringawt pawh nuai 23.6 an thawh. Tuna an sum thawh let hi broadcasting fee-ah an la thehchhuah a ngai dawn a, Mizo club pahnih Chanmari FC leh Aizawl FC inpekna a nasa hle.
Chutihrualin Mizo player-te pawhin khelmual chhungah an theihna zawng zawng an hlan a, coaching staff chauh ni loin club thuneitute pawh an lawm ang. Mizo mipui pawhin Chanmari an thlawp ṭha a, entu ṭhahnem tak an pung khawm a, opening match atana an ticket siam hralh zawh vek a ni.
Gokulam an ṭha
Zan dar 6:30-ah inkhel ṭan a ni a, a hma hret. Chutihrualin zan boruak a nuam a, inkhel pawh a hmuhnawm. Gokulam Kerala lam hi India club ṭha ṭhahnem tak lo enkawl tawhtu Derrick Pereira-a'n a ho a, bul ṭantu zingah pawh foreigner pali awmin, player pawh state hrang hrang aṭanga a ṭha lak khawm an ni.
Kerala team-ah hian Mizo tlangval Moses Lalrinzuala pawh a tel a, Khatla East tlangval hi bench aṭanga rawn lutin, a club hlui Chanmari tan a hnawksak viau bawk. Chutihrualin inkhelah erawh team pahnih hi chak thei ve ve an ni.
A goal lo
Inkhel an ṭantirh lamah Indian Football League inkhel ni loin MPL a ang zawk a, inkhel a rang hle. Gokulam lamin Mirjalol Kasimov hmangin chance ṭha an nei a, keeper T. Mawia tan hna an siam pha lo.
Second half-ah Chanmari winger Aron-a pawhin chance ṭha a nei a, goal zawnah a pet lo. Mizo club-in mawi zetin Gokulam tlarhnung an ṭhiat a, Sawmsanga cross chu substitute Jota-a'n goal-ah a khung thei lo. Dawrpui tlangval Sawmsanga leh substitute Lalpekhlua ten pet goal theihna turah goal sirah chiah an pet ve ve.
Chutihrualin inkhel pumpui thlirin Mizo club-in chak an phu bik lo a, Gokulam-in goal ban an tihper bakah chance ṭha an hlah ve tho. Chanmariin team ṭha lakah point khat hlu tak an hlawh chhuak a, Mizo club hian March 7, Inrinni zan dar 6:30-ah Sreenidi Deccan an mikhual ang.