Dr Hmuchhuaka'n MSL a 'tip off'

Mizoram Basketball inelna sang ber Mizoram Super League season 11-na Tip Off chu February 27, Zirtawpni zan khan Dawrpui Multipurpose Centre-ah neih a ni a, Mizoram State Sports Council (MSSC) vice president Dr. Lalhmuchhuaka'n MSL11 hi a tip off.

MSL khuh hawn zan hian Mizoram Basketball Association (MBBA) president R. Lalnunpuia'n dan bu 'handbook' a tlangzarh. MBBA joint secretary Jimmy Lalmalsawma kaihruaina hnuaiah oath taking neih a ni bawk.

MSL 11 hi March 3, Thawhlehni aṭangin khelh ṭan a ni dawn a, March 11, Nilaini thleng Hawla Indoor Stadium-ah khelh a ni phawt ang. March 12, Ningani aṭangin R. Dengṭhuama Indoor Stadium-ah neih zui a ni dawn. Tun ṭum inelnaah hian team pariat Khatla TBL, Saron BC, Zemabawk BC, Zarkawt BCA, Tuikual South BC, Mission Veng Hotshots, Chanmari BC leh Chhinga Veng BC te an tel ang.

Club pariatte hian league round-ah match sarih ṭheuh khelin vawi khat ṭheuh an intum kual dawn a, league round hi March 18, Nilaini thleng khelh a ni dawn. League round khelh zawhah a sang paliten semifinal an khel ang a, a hnuai lam team paliten relegation game an khel dawn bawk. Semifinal leh relegation game hi March 24, Thawhlehni aṭangin an khel ṭan ang.