Thathana goal a tawk zo lo

Mizo forward Lalthankima'n Indian Super League-a a goal hmasa ber khung mah se, Mohun Bagan laka a club Mohammedan Sporting Club chakpui nan a tawk zo lo a, Bagan lakah 5-1 in an tlawm!

ISL buai vangin Bagan an buai ve lo a, an player neih ṭhat rual pawh chhuah loin an kawl ṭhap thei - ISL khelh ṭan a nih hnuah Bagan ṭhatna hmuh turin a awm zel a, match thum zet a zawnin an chak ta.

Salt Lake Stadium-a inkhelah Mohammedan-in Thathana hmangin Bagan an barakhaih a, corner aṭanga ball kal chu Ainawn Veng tlangval hian ṭha zetin a tauh lut.

Mahse, ngam loh chala chil hnawm ang chauh a ni. Brazilian winger Robinho chuan goal hnihin Mohammedan hi a rawn chhanglet a, chawlhlawk hman hmain Jamie Maclaren chuan a belhchhah leh bawk.

3-1 a nih meuh chuan chak tur a chiang tawh a tih ngam a, second half-ah Bagan-in Manvir Singh leh Dimitri Petratos-a goal mawi bik hmanga scoreline cheimawi belhin, 5-1 in hnehna an chang a, ISL-ah tlawm an la nei lo.

Bagan tan Lalengmawia Ralte (Apuia) chuan ṭum dang ang thoin inkhel bul a ṭan a, Mohammedan tan Thathana bakah Lalremsanga Fanai leh Lalngaihsaka ten bul an ṭan thung.

Inrinni zan inkhel dangah Inter Kashi chuan 2-1 in Kerala Blasters an hneh a, tun season match thum an khelha an chak hmasak ber a ni - I League champion tan Nauris Petkevičius leh Alfred Planas ten goal khat ve ve an khung a, Blasters tana Alfred Planas goal khungin awmzia a nei phak lo.

Zirtawpni zan khan Bengaluru an tlawm bawk a, an mikhual Punjab FC chu 2-0 in an ngam lo. Punjab tan Effiong Nsungusi chuan goal hnih khungin, Bengaluru lamin a chhanletna tur an nei lo a, an tlawm.

Bangalore club tan Lalremtluanga Fanai chuan inkhel bul ṭanin, Punjab FC-in Mizo kawl an nei lo thung. Nizanah ISL match hnih khelh chhunzawm niin, Ningani zan hma chu match dang a awm tawh rih lo ang.