Chak mah se Pakistan an tla

T20 Cricket World Cup-ah Pakistan-in super 8 match tawp berah Sri Lanka an hmachhawn a, sawp an mamawh laia an chak ṭawk avangin semifinal an thleng zo ta lo. Group 2 aṭangin England leh New Zealand ten semifinal an lut a, group 1 lamah South Africa-in knockout stage lut tawhin, hmun ruak pakhat la awm hi nizana India leh West Indies te inkhela chak zawkin an hnawhkhat ang.

Balagolla-ah ṭhumvawra chak Sri Lanka-in vawm hmasak an thlang. Pakistan-in vaw hmasain, opener pahnih Sahibzaba Farhan (100) leh Fakhar Zaman (84) ten bul an ṭan ṭha a, an pahnih inkawp ringawt hian 176 an siam hman hial. Shaheens lamin a tawp khar ṭha tawk lo mah se over 20-a 212/8 runs an siam phak avangin semifinal kawng a la inhawng.

Chutihrualin Shaheens tan semifinal lut tur chuan Sri Lanka hi run 147 aia tam an siamtir a rem lo. Lions kutah New Zealand hmalam hun a awm a, Black Caps awm a nuam lo ang. Sri Lanka opener Pathum Nissanka-a'n run thum bak a siam lo a, Shaheens beiseina a sang chho viau.

Mahse, Sri Lanka-in an mualah tlawm an tum bik lo a, over 15.5-ah 147 aia tam runs an siam avangin New Zealand-in semifinal an lut. Lions hian over 20-ah 207/6 an siam a, chak zo lo mah se Pakistan an tlak phah thung.

New Zealand leh Pakistan point hmuh zat hi a inang chiah a, NRR-ah Black Caps hi +1.390 a nih laiin Shaheens hi -0.123 chauh a ni. Semifinal hi March 4, Nilaini zanah khelh a ni dawn a, New Zealand-in group 1 hmahruaitu an hmachhawn dawn a, South Africa ni turah a ngaih theih. March 5, Ningani zanah semifinal hnuhnung zawk khelh tur niin, England-in group 1 pahnihna an hmachhawn ang.