Yamal hattrick hmangin Barca an sang

Spanish rawlthar duhawm, Lamine Yamal-a'n a career-a a vawi khat nan hattrick a siam a, an mikhual Villareal lakah 4-1 in hnehna a chanpui.

Inrinni zana inkhelah hian Yamal bakah Robert Lewandowski chuan hun tawp dawnah goal khat a khung ve a, Villarreal tan Papa Gueye goal khung chu scoreline cheimawitu chauh a ni.

Spotify Camp Nou-a inkhelah dan pangngaiin Barca-in inkhel an thunun a, chance hlauhawm pawh an insiam nghal. Minute 28-naah Yamal-a'n goal a khung ṭan a, Fermin Lopez-a pass ṭha zet chu Yamal hian cool takin a khung a, Barca hma a hruaipui.

Yamal a hmuhnawm chhunzawm a, minute 37-naah ding lam sirah defender pahnih a paltlang hnuin mawi takin goal kilah a pet lut a, an hmahruaina a belhchhah. Yamal hian chawlhlawk hman hma hretin hattrick siam theihna chance a nei a, a pet over hlauh thung.

Second half-ah Barca bawk an hlauhawm hmasa a, Dani Olmo-a'n chance duhawm a hlah. Villarreal an insiamṭha hret a, minute 49-naah corner aṭanga ball kal zel chu vengtu nei lo Pape Gueye bulah tak a tla a, Senegalese midfielder hian hnai tak aṭanga khungin an si phurh a sut ṭhen.

Villarreal an phur thar a, chance nei chhunzawm nghalin Ayoze Perez-a'n goal ruakah a khung thei lo a, khung ngat se inkhel boruak a inthlak hlawk thei ang.

Goal an chhuah hnuah Barca an insiamṭha a, Yamal leh Ferran Torres ten chance an neih chhunzawm ve lehnghal. Hansi Flick-a naute hi Frankie De Jong awm lo mah se an buai phah lo.

Minute 69-naah Yamal bawk a inlar a, Pedri ball pek ṭha tak um zuiin, mawi takin a pet kual lut a, kum 18 mi Yamal-a'n hattrick a siam.

Hun tawp hma hretin veteran striker Lewandowski-a'n goal khat a thawh ve a, Jules Kounde siamsak chu Lewandowski hian hnai tak aṭangin a khung. Harsa lutuk loin Barca an chak.

Catalan club hian point 64 hmuin pakhatnaah an awm chhunzawm zel a, an hmelma Real Madrid aiin point liin an sang zawk. Real hian zaninah Getafe an mikhual dawn a, an result a zirin an inthlauhna hi a la danglam thei.

Hetihlai hian Madrid club pakhat zawk Atletico Madrid an chak ve bawk a, Atletico hian an mikhualna ramah Real Oviedo chu 1-0 in an hneh a, Julian Alvarez chuan goal awmchhun a khung.