Napoli chakna Hojlund leh Lukaku

Inrinni zan Serie A inkhelah Napoli chuan hnehna an chang a, Napoli tan Manchester United forward hlui pahnih Rasmus Hojlund leh Romelu Lukaku ten goal an khung a, Verona tan Jean-Daniel Akpa Akpro chuan goal a khung ve bawk.

Marcantonio Bentegodi, Verona-a inkhelah mikhual Napoli-in goal an khung hmasa zawk a, minute hnihna lekah Matteo Politano cross aṭanga kal zel chu Hojlund-a'n penalty spot bul aṭangin a tauh lut a, Napoli-in hma an hruai. Verona keeper Lorenzo Montipò-a'n a ban pha lo.

Hojlund a hlauhawm chhunzawm a, keeper a paltlang tawh hnuah goal-ah a pet a, an lo petchhuahsak hman hlauh. Eljif Elmas-a'n chance ṭha a hlah bawk a, goal khata hmahruai chungin chawlhlawk an hmang.

Second half-ah Napoli bawk an chungnung a, goal chance an insiam thei meuh lo thung. Napoli inrinloh laiin Verona-in goal an khung a, minute 63-naah corner aṭanga ball kal zel chu Akpa Akpro-a'n a pet a, Hojlund-a'n lo dang pialin goal-ah a lut a, vannei takin Verona-in an si phurh an sut.

Team pahnihte an innawr chhunzawm a, an chance neih an chhawr ṭangkai thei meuh lo. An inhnetawk dawna a lan laiin, hun pek belhah Giovane cross chu Lukaku-a'n a pet goal a, hun a tawp zui nghal avangin vannei takin Napoli an chak.

Tun season-ah Napoli che chhe lo mah se hliamin a tibuai a, Coppa Italia leh Champions League aṭangin petchhuah an ni tawh. Serie A-ah pawh champion a beiseiawm tawh lo a, season thara Champions League khelh chu an beisei theih tawk a ni.

Antonio Conte naute hian point 53 hmuin pathumnaah an awm a, an chung chiaha awm AC Milan aiin khelh khata khel tam zawk chungin point khatin an hniam zawk. Napoli hi a an hnuaia awmte nen an inthlauhna a tam lo a, a sang pali zingah awm an tum a nih chuan an chetsual a thiang tawh lo.