Aston Villa an tawlhthlu

Premier League-ah Aston Villa-in Inrinni zan khan table mawngphaha awm Wolverhampton Wanderers 2-0 in an hneh lo. Wolves tan hian Joao Gomes leh Rodrigo Gomes ten an khung a, tun season-a an vawi hnih chakna chauh a ni.

Molineux Stadium-ah mikhual Villa an chungnung zawk a, mah se a pawimawh ber goal an khung thei lo. Unai Emery-a'n tlarhmaah Ollie Watkins leh Morgan Rogers te a chhawr a, an goal bawh pawh a na viau.

First half-ah goal hmuh tur a awm lo a, second half-ah mikhual team-in an khung hmasa zawk. Minute 61-naah Joao Gomes-a'n ṭha zetin Wolves tan a khung a, inkhel entu thawm a ṭha hle.

Mualneitu lamin chak turin goal khat a tawk tih an hria a, goal venhim hna an thawk. Villa lamin na takin an nawr a, injury time-ah an nawr nasat vangin goal an chhuah phah. Wolves-in counter attack an hmang ṭangkai a, injury time-ah Rodrigo Gomes hmangin chak nemnghehna goal an khung.

Wolves hian hnehna chang mah se point 13 chauh an la hmuh avangin Premier League-a inhamtan a harsa tawh dawn. Aston Villa pawhin point an hlawhchhuah loh avangin point 51-ah an tang rih a, nizan lama Manchester United-in hnehna an chan chuan palinaa tla thla thei dinhmunah an ding. Unai Emery hote tan season thara Champions League khelh a harsa dawn.