Lakers an chak leh ta

A zawna match thum an tlawm hnuah, Los Angeles Lakers an chak leh ta a, Lakers hian nimin zing khan Golden State Warriors chu 129-101 in an hneh.

Chase Center, San Francisco-a inkhelah Luka Doncic leh LeBron James an langsar a, Doncic hian point 26 neiin a score sang ber a, assist pariat a nei bawk. James-a'n point 22 a score a, assist vawi kua neiin rebound vawi sarih a nei bawk.

Kum 41 mi James hi a kum tam ve deuh tawhin a khel pawh tun hma pha tawh lo mah se, team tan a ṭangkai ber pawl a la ni thei a, player naupang zawk ai pawhin hmuhnawm chang a nei.

Doncic leh LeBron bakah hian Austin Reaves (18), Luke Kennard (16) leh Jake LaRavia (15) te Lakers chak nan an thawhhlawk hle.

Warriors tan Gui Santos-a'n point 14 neiin a score hnem ber a, Moses Moody leh Gary Payton II ten point 12 score ve bawk mah se an chak ta chuang lo.

Warriors tan an thiampuipa Stephen Curry a la inlan thei lo zel a, Curry hi a chawlh chen tur chiang lo mah se, a la rawn kir hnai lo niin amah Curry chuan chanchinbu mite a hrilh.