Chelsea leh red card - kawp tura duan!

Champions League khelh tum Chelsea-in red card an chawi leh ta a, Arsenal lakah 2-1 in an tlawm zui. Pedro Neto-a'n red card a hmuh chiah khan, tun season-a Blues-in Premier League bika red card an hmuh vawi sarihna a ni!

Tun season-a EPL club zingah Chelsea-in red card an hmu hnem ber a, league match 10 khelh tur la nei chungin EPL season khata red card hmu hnem ber record chu card hnih chiahin an phak lo tawh.

Chelsea hian inelna hrang hrangah red card vawi kua an chawi tawh a, heng zingah hian manager ban tak Enzo Maresca-a'n Liverpool laka red card a hmuh kha chhiar tel a ni lo.

Blues-in red card an hmuhna inkhelah vawi li an tlawm a, vawi hnih draw neiin, vawi thum an chak - an chak pathum zinga pahnih hi Champions League leh League Cup a ni a, EPL bika red card an hmuh vawi sarihah vawi li an tlawm tihna a ni.

Chelsea-in UCL khelh phak an tumna kawngah an discipline hian na takin a nghawng ang tih a chiang a, insiamṭhat an mamawh takzet.

Blues coach Liam Rosenior chuan, "Enzo Maresca kha ka zah em em a, ka lo awm hmaa thil thleng sawi ka duh lo. Mahse, tunah chuan ka hnuaiah pawh red card kan hmu ve ta.

"A nihna takah chuan kan discipline chhia kha kan siam fel tawhah ka lo ngai a, match 10 zet chu red card hmu loin kan khel hman. Mahse, tunah chuan match hnih aṭangin red card pahnih kan hmu a, hei hi siam ṭhat vat a ngai a ni," a ti.

Chelsea hian March 4, Nilaini zan dar 1:00-ah league match khel turin Aston Villa an lenchilh zui dawn a, Arsenal hian Nilaini zan dar 1:00-ah vek Brighton & Hove Albion an lenchilh ang.