Juventus-in Roma hnaih belh thei lo

Juventus chuan Pathianni zan khan 3-3 in Roma an inhnehtawk a, Turin club hian Roma nen an inkar point khata tihzimna hun ṭha an bawhpelh a, Cesc Fabregas-a enkawl Como an chak avangin Juve hi paruknaah an tla.

Pathianni zan Serie A inkhelah hian Roma tan Wesley Franca, Evan Ndicka leh Donyell Malen ten goal an khung a, Juventus tan Francisco Conceicao, Jeremie Boga leh Federico Gatti te goal hmangin an sut a, an him hram.

Stadio Olimpico-a inkhelah mualneitu lamin chance an nei hmasa zawk a, minute thumna lekah Lorenzo Pellegrini-a'n Juve keeper Mattia Perin-a dan per chu hnai tak aṭangin a pet over, Aston Villa aṭanga an hawh Donyell Malen-a'n chance ṭha a hlah bawk.

Roma an vanduai reng lo a, minute 39-naah Wesley-a'n box pawn aṭangin pet kual lut a, mualneitu team-in hma an hruai. Goal khata hmahruai chungin Roma-in chawlhlawk an hmang.

Second half an ṭan deuh chiah tihin Juve-in goal an khung nghal a, minute 47-naah Conceicao-a'n kawh takin goal kilah tak a hlap lut a, an siphurh a sut. Roma player ten Portuguese forward an veng ṭha tawk lo.

Goal an chhuah hnuah Roma an phur sawt emaw tih turin an khel a, Minute 54-naah Pellegrini cross chu Ndicka-a'n a pet lut a, Perin-a'n a en liam. Mualneitu an phur laklawh a, minute 10 hnuah goal an khung lehnghal. Manu Koné-a pass ṭha tak chu Malen-a'n a um lut a, keeper chauh a hmachhawn hnuah cool takin a chip goal a, an hmahruaina a belhchhah.

Dutch forward Malen hian January-a Roma a pan hnuah a khel ṭha a, match sarih khelin goal ruk a khung tawh a, Roma chet ṭhat chhan pakhat a ni. Goal hnih an chhuah hnuah Roma ben harhin an awm a, minute 78-naah Boga-a'n an siphurh a sut ṭhen a, hun pek belhah Gatti-a'n chiang taka pet goal-in an siphurh a sut zo a, goal dang luh nan hun a awm tawh lo a, inkhel hmuhnawm takah chak zawk an awm lo.

Roma hian point 51 hmuin palinaah an awm chhunzawm a, champion beiseina nei tawh lo mah se season thara Champions League khelh an tum. Juve pawhin Roma ang thoin nomawi beisei tur an nei tawh lo a, palina nih phak tumin an bei mek. Luciano Spaletti naute hi an chesual reng a nih chuan Champions League khel lo thei dinhmunah an ding.

Hetihlai hian table-a pahnihna AC Milan chuan 2-0 in Cremonese an hneh a, Milan tan Strahinja Pavlovic leh Rafael Leao ten goal an khung a, Cremonese-in chhanletna tur an nei lo.