Marseille chakna Aubameyang

Pathianni zan Ligue 1-ah Olympique Marseille chuan leh Lyon an inhmachhawn a, inkhel hmuhnawm takah Marseille in 3-2 in hnehna an chang a, Pierre Emerick Aubameyang-a'n goal hnih khungin Marseille-in Lyon an lehthal.

Arsenal forward hlui Aubameyang bakah hian Igor Paixao chuan goal khat a khung ve bawk a, Lyon tan Corentin Tolisso leh Remi Himbert ten goal khat ve ve an khung bawk.

Stade Vélodrome-a inkhelah mikhual Lyon-in goal an khung hmasa a, minute thumna lekah Tolisso-a'n hmahruaina goal a khung a, Bayern Munich midfielder hlui hi Marseille player ten an veng ṭha tawk lo.

Lyon bawk an hlauhawm chhunzawm a, Real Madrid aṭanga an hawh Endrick-a volley chu goal zawnah a kal lo hlauh. Mualneitu lamin vawi tam goal khung theihna chance an hlah a, Ligue 1-a goal khung tam ber ni mek Mason Greenwood chuan vawi thum lai chance ṭha a hlah.

Second half-ah Marseille an insiamṭha a, minute 53-naah Paixao-a'n box pawn aṭangin mawi takin a pet kual lut a, an siphurh an sut avangin Marseille ṭantute thawm a ring hle. Marseille-in inkhel an thunun zawk a, mahse goal an chhuah hmasa leh! Minute 76-naah Remi Himbert-a'n tawih takin a pet goal a, Lyon hma a hruai nawnpui.

Mualneitu Marseille-in goal chhuah leh mahse an mualah tlawm an tum lo a, minute 81-naah corner aṭanga ball kal zel chu Aubameyang-a'n a pet goal a, an siphurh a sut nawn.

Team pahnihte an inhnehtawk dawna a lan laiin goal a lut leh a, injury time-ah Auba bawkin goal ruakah a khung a, huna tawp zui nghal avangin Marseille chak nan a tawk.

Chelsea leh Barcelona tan pawha lo khel tawh Auba hian tun season Ligue 1-ah goal riat a khung tling chiah a, kum 36 mi ni ve tawh mah se Aubameyang hi a team tan mamawh chhanna a la ni reng.

Marseille hian season tharah Champions League khelh an tum a, point 43 hmuin palinaah an awm mek a, pangana Lille nen point thumin an inthlau. Match 10 chiah khelh tur a awm tawh avangin Habib Beye naute tan chetsual chi a ni tawh lo.

Tun season-ah Marseille hi an che chhe hran lo a, mahse 5-0 laia Paris Saint Germain an hneh loh hnuah Champions League aṭangin pet chhuah an ni a, February 11 khan head coach Roberto de Zerbi an ban. De Zerbi aiah Habib Beye la lutin, Senegalese coach hnuaiah harhtharna chan an tum chho mek.