Middle East buainain Australian GP tibuai dawn lo

March 8, Pathiannia ṭan tur Australian Grand Prix chu Middle East-a buaina vanga zin veivakte buaina chuan a nghawng dawn lo niin Australian GP huaihawttuten an sawi.

Inrinnia US leh Israel-in Iran a beih vangin staff member 1000 bawr vel chu an flight cancel sak an ni a, an zinga 500 vel chu Europe aṭangin private-in an zin a ngai.

Staff ṭhenkhat chu Bahrain-a pre season test an neihnaah an la tang a, Doha leh Dubai airport khar a ni bawk a, hei hian inelna neihna hmun tur Melbourne pan a tiharsa hle.

Thawhṭanni khan Australian Formula 1 chief Travis Auld chuan,"Darkar 48 liam ta chhung khan thlawhna chungchangah buaina tawk an awm nasa a, mahse an buaina hi Formula 1 mawhphurna a ni.

Team, driver leh staff te thlengin he intlansiaknaa tel turin kan mamawh, intlansiak hunah an inpeih hman vek kan beisei a, fans ten engmah thleng lo ang maiin thil a kal leh dawn," tiin engkim a fel tur thu a sawi.

Hetihlai hian Formula 1 chuan thil thlen dan chu uluk takin an en dik ve reng bawk a, April thlaa Bahrain leh Saudi Arabia-a inelna neih tur chu harsatna awm loa thlentir an tum hle.