Cavaliers tan Harden a che ṭha zel

American shooting guard James Harden chu a club thar, Cleveland Cavaliers tan a che ṭha zel a, nimin zinga Brooklyn Nets 106-102 a an hneh ṭumin a langsar hle. Cavs tan Harden hian point 22 score-in a score hnem ber a, assist pariat neiin, rebound vawi kua a la bawk a, triple double a siam teuh viau.

Harden bakah Jarrett Allen (20), Evan Mobley (17) leh Sam Merrill te an che ṭha a, Cavaliers chak nan an thawhhlawk hle. Nets tan Michael Porter Jr chuan point 26 neiin a score sang ber a, Danny Wolf (23), Nolan Traore (17) leh Grant Nelson (11) te khel ṭha mah se an vanduai ṭum an tawng a, point li lekin an chak lo.

Cavaliers tan Donovan Mitchell a la inlan thei lo a, American shooting guard hi February tawp lamah a kap bawrah hliam a tuar a, Milwaukee Bucks leh Detroit Pistons an hmachhawn ṭumin a inlan tawh lo a, a rawn kir hun tur sawi chian theih a ni lo.

Mitchell awm lo mah se Harden a che ṭha a, Cleveland Cavaliers a zawm hnuin player pawimawh a ni nghal a, Mitchell hmun ruak a hnawh khat hneh hle. Kumina kum 37 tling tawh tur Harden hi a kum tam ve deuh tawh mah se team innghahna ber a la ni.