Inthlahdah thei kan ni lo - Slot

Liverpool boss Arne Slot chuan inthlahdah thei an nih loh thu a sawi. Dutch coach chuan, "Inthlahdah thei dinhmunah kan ding lo hrim hrim a, eng team mah hi inthlahdah thei an ni lo. Team zawng zawngin hlawhchhuah neih tuma kan khelh lai a ni a, keini pawhin hlawhchhuah tur kan nei.

"Season thara Champions League khel phak turin theihtawp tak meuh meuh kan chhuah a ngai a, FA Cup khelh tur kan la nei bawk. Chuvangin kan inkhel turah rilru kan pe ang," a ti.

Liverpool hi Manchester City laka 2-1 a an tlawm hnu khan league match thum chu a zawnin an chak leh tawh a, zanin dar 1:45 hian league match khel turin Wolverhampton Wanderers an lenchilh zui dawn - Zirtawpni zan dar 1:30-ah vek FA Cup fifth round khel turin Wolves hi an lenchilh leh bawk ang.

Hetihlai hian Liverpool attacking midfielder Florian Wirtz a la dam chiang thei lo. Slot chuan, "Thawhlehni zana kan inkhel tur hi a tan a la hma hret a, kartawpah pawh a la inlan thei lo mai thei. Karlehah tal chuan a lo kir kan beisei a, chiang taka sawi theih erawh a awm lo," a ti.

Liverpool hi EPL table-ah pangana an ni mek a, match 10 khelh tur la neiin, palina Aston Villa chu point thum chauhin an phak lo mek. Season tharah EPL top five chinin UCL an khelh a rinawm a, mahse, Reds hi parukna Chelsea aia point thum leka an san avangin an la him chuang lo.