Antony-a'n Betis chakpui zo lo

Pathianni zan La Liga-ah Real Betis leh Sevilla te 2-2 in an inhnehtawk a, Betis tan Manchester United forward hlui Antony leh Alvaro Fidalgo ten first half-ah goal an khung. Sevilla tan Isaac Romero leh United forward hlui tho Alexis Sanchez ten second half-ah an sut.

Estadio de La Cartuja, Seville- a inkhelah Betis an hlauhawm hmasa zawk a, minute 16-naah Abde Ezzalzouli-a'n thui tak khalhin a cross a, buai nuai nuai karah a per chu Antony-a'n a bin lut a, Betis-in hma an hruai. Kum 26 mi Antony hian tun season La Liga-a goal ruk a khungna chiah a ni.

Ezzalzouli bawk a hmuhnawm a, minute 37-naah a ball pek ṭha tak chu Fidaldo-a'n a um lut a, cool takin a khung a, an hmahruaina a belhchhah a, goal hniha hmahruai chungin Betis in chawlhlawk an hmang.

Second half-ah Sevilla an harchhuak a, minute 61-naah Alexis Sanchez-a'n ṭha taka tauh lutin an siphurh a sut ṭhen a, minute 85-naah Romero-a'n kawh takin a pet goal a, an siphurh a sut zo. Goal dang lut zui loin hun a tawp a, team pahnihte point khatah an lungawi a ṭul.

Real Betis hian point 43 hmuin panganaah an awm mek a, palinaa awm Villarreal chu point riatin an pha lo. Betis hian season tharah Champions League khelh an inbeisei a, Villarreal lehpelh an tum a nih chuan an chesual thiang tawh lo.