Club dang chunga leng Man United

Manchester United-in Sir Alex Ferguson-a awm loh hnua a vawi khat nan January thlaah Premier League chung ber, vawt nuam tak chu an luah ve ta. Ole Gunnar Solskjaer-a hote hian league hmahruaitu ni tur hian Thawhlehni zan khan Turf Moor-ah Burnley 1-0 in an hneh a, goal awmchhun hi Paul Pogba khung a ni. 

Man United hian match 17 khelh aṭangin point 36 an hlawh chhuak a, Liverpool aiin khelh zat inangah point thumin an hmu tam zawk. Amaherawhchu Pathianni zan dar 10 hian Jurgen Klopp-a hoten Anfield-ah Man United hi an mikhual dawn a, Premier League champion hian an hmelma club hi a chung bera hun rei awm an phal lo ang.

Ole Gunnar Solskjaer-a'n, "January thlaa table hmahruaitu tumahin an hre zui lo," ti mah se a player thlan danin chak a duhzia a lang. FA Cup-a Watford hmachhawntute aṭangin Eric Bailly chiahin bul a ṭan nawn.

Norwegian manager hian Premier League match hnuhnung bera Aston Villa an hmachhawn ṭum aṭangin player pahnih a thlak a, Fred leh Scott McTominay te aiah tawnhriat nei ṭha zawk Nemanja Matic leh Edinson Cavani te an lut.

United tana bul ṭantute chu David de Gea; Aaron Wan-Bissaka, Bailly, Harry Maguire, Luke Shaw; Pogba, Matic; Marcus Rashford, Bruno Fernandes, Anthony Martial leh Cavani te an ni.

Turf Moor-ah Manchester United-in inkhel an thunun a, Burnley-in injury time-ah goal zawnah an pet ve chauh. Amaherawhchu Solskjaer-a naute hian ball chang tam siin goal khung an harsat a, VAR an lamah a ṭang lo bawk.

Minute 27-naah United-in counter attack hmangin an vaw let a, Cavani-a'n fing takin Robbie Brady kap karah a khung mah se Burnley midfielder hian box pawnah a ti tlu. Referee Kevin Friend-a'n United freekick pein Brady yellow card pe nghal mah se red card pek theihna a nih avangin VAR an hmang.

United duh bak bakin an en let a, counter attack ṭanna tura Shaw-a'n ball pet tel chu Johann Gudmundsson a pet tel chu referee hian a en thleng. Minute ruk zet hun an hman hnuah VAR hmangin Brady yellow card sut a ni a, Shaw-a'n yellow card a hmu ta zawk. 

Man United lungawi lohna belhchhah turin Shaw-a cross chu minute 36-naah captain Maguire-a'n angle zim tak aṭangin a tauh lut. English defender hian amah vengtu Erik Pieters a nam nat hret avangin referee Friend-a'n a pawmsak lo.

Anthony Martial-a'n first half-ah chance ṭha ṭum hnih a hlah a, midfielder goal khung thei Bruno Fernandes pawh mamawh chhanna a ni thei lo a, first half-ah goal a lut lo.

Inkhel boruak a sang a, hmahruai thei dinhmuna an din avangin Man United-in pressure an ngah. Hetiang hunah hian player ṭha danglamna a lang ṭhin a, United pawhin World Cup nomawi chawi Pogba an kawl. French midfielder Pogba hian sawisel tawk ṭhin bawk mah se United player manto ber a ni a, pound maktaduai 89.3 man zet a nih avangin an beisei a sang hi a mak lo. Burnley nen erawh Pogba hian Rashford-a cross chu boruaka a awm laiin a hlap nghal a, Clarets defender Matthew Lowton-a'n a dan pial hnuah keeper Nick Pope-a venah a goal.

United-in goal dang an khung belh tawh a, hun tawp lamah erawh Burnley-in siphurh sut tumin an nawr let avangin an talbuai thung. Chutihrualin chance nei ṭha zawk erawh Solskjaer-a hote an ni tho a, Martial-a'n keeper chiah a hmachhawn hnuah goal-ah a chantir thei lo.

Manchester United manager Ole Gunnar Solskjaer chuan, "Point thum hlawhchhuah hrim hrim chuan kan hlim ṭhin. Tun ṭumah erawh harsa takin kan hlawh chhuak a, a hlu zual. Kan goal khung an pawm loah khan foul ka hmu lo. Goal dang chu khung belh ila, awlsam deuhin kan chak thei tur a ni a, mahse duh ang vekin thil a thleng lo.

Solskjaer chuan, "Goal kha chu goal ṭha bik a ni a, a pet dan hmang thleng khan a ropui. Paul Pogba a khel ṭha em em a ni," tiin goal khungtu a fak a, Liverpool nena an inkhel turah a phur tawh thu a sawi bawk. Manchester United hian Sir Alex Ferguson-a hnuaia 2012-13 season-a nomawi an chawi zawh khan match 17 khelh zawhah hmahruaitu an la ni leh ngai lo a, chu chauh ni loin pakhatna nen an kar a hla ṭhin. 

Tun season-ah pawh United aiin Liverpool leh Manchester City chu champion rinkai zawk la ni mah se Solskjaer-a hote tan an thlen chin ringawt pawh hi a chhuanawm hle.