Aizawl FC coach thar Khalid Jamil

Mizoram club zinga I League khel awmchhun Aizawl FC chuan nimin khan coach atan Khalid Jamil an lakluh thu an puang. Mizo club enkawl tur Jamil hi Mumbai FC coach hlui a ni.

I League hi nakkum January-ah khelh ṭan a ni dawn a, Aizawl FC hian I League match hmasa berah January 7 khian East Bengal chu RG Stadium, Mualpuiah an hmachhawn nghal ang.

I League-ah AFC

Aizawl FC hian season liam ta khan Manuel Retamero kaihhruaina hnuaiah I League an khel a, beisei anga result ṭha an neih loh avangin Spanish coach aiah youth team lama hotu Jahar Das chu senior team enkawl turin an kaisan tir a, coach K. Malsawmkima'n Bengali coach hi a pui bawk.

AFC-in I League an khelh hmasak berah pariatna an ni a, table mawngphaha awm DSK Shivajians an relegate theih loh avangin MPL club hi tla tur an ni. Amaherawhchu India ram football kalphung mumal lo vanneih puiin tun season-ah AFC-in I League an khel leh dawn.

Season tharah Goan club pathum second division champion Dempo bakah Sporting Goa leh Salgaocar te tel tum lo mah se AIFF-in club pali Mizo club AFC, Minerva Punjab FC, Chennai City FC leh Churchill Brothers tel a phalsak avangin I League-ah hian team 10 an inel ang.

AFC enkawl châk Jamil

Aizawl FC coach thar Khalid Jamil-a chuan, "Mumbai FC kaihruaiin nikum khan Aizawlah ka rawn kal tawh a, Mizoram football boruak hi nuam ka ti. Aizawl FC enkawl hi ka châk a, Mumbai FC aiin ka enkawl ṭhat theih zawk ka beisei," tiin Mizo club lakah beiseina a neihsan thu a sawi.

AFC president Robert Ro-mawia Royte chuan, “Coach thar ṭha tak kan nei a, kuminah team ṭha zawk kan neih ngei ka ring” tiin coach thar chunga rinna a nghah ngam thu a sawi.

Tu nge Khalid Jamil?

Khalid Jamil hi April 21, 1977 khan Indian nupa inkarah Kuwait City, Kuwait-ah a piang. Jamil hi Kuwait-a a awm lai hian Kuwait Under 14 camp-ah a awm a, Michel Platini hmuin France legend hi hetihlai hian France national football team coach a ni.

Jamil-a player ngaihsan ber hi Platini a ni zui a, khelmual chhunga a position pawh midfielder a ni. India ramah insawnin East Bengal leh Mohun Bagan te aṭangin sawmna hmu mah se Kolkata club lian hian zu company aṭanga sponsor an neih avangin a zawm duh lo.

Kum 1997-ah Jamil hian professional career chu Mahindra United-ah ṭanin National Football League-ah erawh vawi khat mah a inlan lo. Kum 1998-ah Air India a zawm a, Mumbai club-ah hian kum 2001 thleng awmin Brunei aṭangin sawmna hmu mah se a hnawl - a thutluknaah erawh tun thlengin a inchhir.

Jamil hi kum 2002 khan Air India aṭangin Mahindra-ah a let a, inhliam vangin a inlan mumal lo. Kum 2007-ah Mumbai FC a zawm a, inhliam vangin kum hnih chhungin vawi khat mah a inlan lo. Kuwait-ah piang mah se Jamil hian India tana khelh a thlang a, ram tan vawi sarih khelin ram tana a inlan hi kum 2001-ah vek a ni.

Inhliam vanga a inkhelh theih loh hnuah Jamil hian kum 2009 khan English coach David Booth thlakin Mumbai FC chu I League-ah a enkawl ṭan a, season liam ta thleng Mumbaikars hi a enkawl. Season hnuhnung berah Mumbai hi pangana an ni a, Jamil-a hnuaia an thlen san ber ṭum a ni.

Aizawl FC Fixtures

Round 1 : January 7, Inrinni

Aizawl FC Vs East Bengal RG Stadium, Aizawl

Round 2 : January 13, Zirtawpni

Aizawl FC Vs Minerva Punjab FC RG Stadium, Aizawl

Round 3 : January 17, Thawhlehni

Aizawl FC Vs Shillong Lajong RG Stadium, Aizawl

Round 4 : January 22, Pathianni

Mumbai FC Vs Aizawl FC Cooperage Stadium, Mumbai

Round 5 : January 28, Inrinni

Chennai City FC Vs Aizawl FC Nehru Stadium, Chennai

Round 6 : January 31, Thawhlehni

DSK Shivajians Vs Aizawl FC Balewadi Stadium, Pune.

Round 7 : February 4, Inrinni

Mohun Bagan Vs Aizawl FC Rabindra Sarobar Stadium, Kolkata

Round 8 : February 10, Zirtawpni

Aizawl FC Vs Churchill Brothers RG Stadium, Aizawl

Round 9 : February 15, Nilaini

Aizawl FC Vs Bengaluru FC RG Stadium, Aizawl