Arsenal nomawi a keh leh tawh?

Emirates Stadium-a inkhel entute chu season hmasa a tawp dawn khan 'Wenger Out' tiin an au fo a, season ṭantirah erawh Arsenal ṭantute tan 'In Arsene Wenger We Trust' tih chu an thupui a ni leh tho ṭhin - He thu hlawm lian pahnih hi tun hnai kum thum chhung vel chu Gunners fan-te buaipui leh inhnialna lian ber pakhat a ni.

Arsenal ṭantuten football an sawi apianga an titi tui leh thupui ber pakhat chu 'The Invincibles' a ni. French manager kaihhruaina hnuaiah Arsenal hian league match 38-ah hneh loh an tawng lo a, tuma el phak rual lohin nomawi an chawi, hei hi kum 2003-04 season daih tawh kha a ni. Arsenal hian hemi hnuah hian league nomawi an chawi leh tawh lo a, an champion hnuhnun bera piangte pawh kum 12-a upa an ni ta! Hei hian a lantir chiang tak pakhat chu Arsenal ṭhat lai chu 'hman lai' a ni tawh.

A fuh thei lo

Sum hmang hreh tia sawi ṭhin Wenger-a'n Borussia Moncheng-ladbach aṭangin pound maktaduai 35 man Switzerland midfielder Granit Xhaka a lei a, transfer tawp dawnah pound maktaduai 52 velin Germany defender Shkodran Mustafi leh Spanish striker Lucas Perez te a lalut bawk. French manager hian nipui lai khan player thar lakluh nan pound maktaduai 100 vel bawr a hmang!

Gunners fan-te an pu chet dan avangin an lawm a, season ṭan hma aṭangin beiseina an nei sang. League match hmasa ber atan Liverpool mikhualin 4-3 in an chak lo. Gunners an insiamṭha nghal a, a zawnin match 14 chhung hneh loh tawng loin an kaltluang cho a, league table-ah pawh pahnihna an ni hman hial.

Mahse, Gunners lawmlai a rei lo. Goodison Park-ah 2-1 in an chak lo a, ni nga hnu lekah Manchester City 2-1 bawkin an hneh lo leh. Arsenal hian league hmahruaitu Chelsea an phak lohna chu point kua a ni tawh. Season chawhma lam chauh a la ni a, inkhelh hmabak 21 zet a la awm avangin Gunners tan insiamṭhatna hun a la awm a, chutih rualin nomawi chawi leh chawi loh chu an mahni kutah a innghat tawh lo.

Ozil vang a ni em?

Real Madrid midfielder hlui Mesut Ozil thiam zia inhrilh nawn a ngai lo. Chutih rualin Germany international hian inkhel pawi-mawhah a mawhphurhna a hlen tawk lo tia sawiseltute pawh dem theih an ni bik lo ang. Kum 28-a upa Ozil hian tun season-ah Arsenal tan match 20 khel tawhin goal kua a khung tawh a, a khel chhe lo. Mahse, Everton leh City an hneh loh ṭumin beisei a phak lo thung.

Ozil hian tharum a ngah lo a, skill a nei ṭha thung. A thiam-na hmangin goal a khung bakah a ṭhiante goal khung tur a siamsak ṭhin. Inkhelah chuan goal khung tluk zetin a venhim a pawimawh a, hei tak hi Ozil sawiseltute ṭan chhan a ni.

Goodison Park-ah 1-1 in an inhnehtawk laiin Everton lamin corner an hmu. Toffees tan Ashley Williams chuan chakna goal a tauh lut, he goal luh lai hian Ozil-a'n a ven tur a veng lo a, ball lo kal chu a ngaihsak tawk lo tih a lang bawk.

Pathianni zan khan Eithad Satdium-ah Arsenal an lenglut leh a, sikhat faia hma an hruai chu inlehthaltirin 2-1 in an chak lo. City lakah Gunners goal nawr a na tawk lo a, striker atana hman Alexis Sanchez tana ball ṭha petu an awm mumal thei lo. Chile international hi Premier League season kal meka goal khung thei berte zinga mi ni mah se inkhel zawng zawnga goal khung thei a ni bik lo.

Playmaker Ozil-a'n inkhelh chhung zawngin key pass vawi khat chiah a nei a, City player nen ball an inchuhah 25% chiah chungnung zawkah ṭangin vawi 14 zet ball a hloh bawk. Hetih lai hian City thahrui pawimawh Kevin de Bruyne chuan vawi sarih zet key pass a nei thung.

Tlarhnung pawp

Season inbuatsaih laiin captain Per Mertesacker a inhliam a, a aiawh turin a hnampui Mustafi lakluh a ni. Valencia defender hlui hi Laurent Koscielny nen an inkawp fuh a, 'Kostafi' tiin an hminglem an vuah sak hman hial. Germany international Mustafi a inhliam hnuah tlarhnung laiah Gabriel Paulista dahluh ṭhin a ni.

Arsenal hian goal 38 khung tawhin anni aia khung tam chu goal 41 khung thei Liverpool chiah an ni. Gunners hian tun hnaiah a zawnin league match riat chhung chu goal an chhuah ziah.

Petr Cech-a'n Premier League season 13 a khelh chhunga clean sheet a neih loh zawn rei ber ṭum a ni hial - Arsenal tlarhnung a phui lo takzet. Kum 34-a upa Cech hian kum 2004 hnu lamah league match bikah vawi 141 zet clean sheet a nei thei a, tun hi a tan hun thim a ni mek.

Tun dinhmun thlir chuan Arsenal tan champion nomawi chu ban phakah a awm rih lo. Amaherawhchu, beisei bo a la ni lo a, football-ah chuan thil thleng thei tam tak a la awm. Khawvela huapa manager langsar ni phak ṭhiau Jose Mourinho, Pep Guardiola, Antonio Conte leh Jurgen Klopp te khuma nomawi chawi tur chuan Wenger tan team dinthar a hun takzet.