Inhnialna tawp thei lo Cristiano Ronaldo Vs Lionel Messi

Kum 10 chhung chu Lionel Messi leh Cristiano Ronaldo ten khawvel football an thunun tawh a, mimal chawimawina Ballon d'Or dawn kawngah te, Champions League bakah inelna lian tham nomawi chawi kawngah te player ropui pahnih hi khaikhin zel an ni a, inhnialna tawp thei lo a ni.

Final leh Goal

Ronaldo leh Messi hian final vawi 16 an khel tawh a, final bika goal khung kawngah Argentina captain a chungnung. Barcelona forward Messi hian final-ah goal 13 a khung a, Ronaldo hian goal 11 a khung tawh thung. Supercopa de Espana chhiar tel chuan Messi hian goal 25 khungin Ronaldo hian goal 14 a khung a, Barcelona forward hi final-ah a langsar ṭhin zawk.

Champions League

Real Madrid-in Champions League-ah record an nei ṭha a, Ronaldo awm hnuah vawi hnih an champion leh tawh bawk. Portugal captain hian 2013/14 season-ah ringawt khan goal 17 tehmeuh a khung a, season liam ta khan goal 16 khungin Champions League-ah a champion leh bawk. Ronaldo hian Manchester United tana a khelh lai nen Champions League-ah vawi thum a champion tawh.

Lionel Messi hian Champions League nomawi vawi li a chawi tawh a, Barcelona tan vek a champion. 2011/12 season khan Argentine forward hian goal 14 a khung a, season khata a goal khung tam ber a ni a, tun season-ah Messi hian goal 10 khung tawhin amah leh Ronaldo record khum thei dinhmunah a la ding.

Hattrick

Match khata goal thum (hattrick) khung tam lamah Ronaldo a chungnung a, Real Madrid forward hian hattrick vawi 45 siam tawhin Messi hian vawi 41 a siam ve tawh bawk. Champions League bikah Messi-a'n hattrick vawi sarih a siam a, Ronaldo aiin vawi hnihin a siam tam.

Ballon d'Or

Kum 2007 khan Brazilian player Kaka chuan Ballon d'Or chawimawina a dawng a, hemi hnu hi chuan mimal chawimawina ngaihsan Ballon d'Or hi Ronaldo leh Messi ten an hui fai vek.

Argentina captain Messi hian Ballon d'Or vawi nga dawng tawhin, Ronaldo hian vawi li a dawng tawh thung. Portugal captain hian chawi-mawina sem hnuhnung pali zinga pathum a hui a, dah hniam theih a ni lo.

Season ṭha bik

Barcelona forward Messi hian 2011/12 season khan goal 73 tehmeuh season khatah a khung a, kum thum hnuah Ronaldo-a'n season khatah goal 61 a khung ve bawk. Portugal captain hian Real Madrid tana a season hmasa ber tih loah chuan season ruk chhung season tinin goal 50 aia tam a khung ziah a, Messi hian season sarih chhung chu season tinin goal 40 a khung tling ziah bawk.