Bundesliga hmahruaitu nih inchuh Bayern Munich vs RB Leipzig
Zanin dar 12:30 hian Bun-desliga season kal meka inkhel pawimawh bera ngaih pakhat a awm dawn. Champion lai Bayern Munich chuan Allianz Arena-ah RB Leipzig an lo mikhual dawn a, a chak zawk zawk chu league hmahruaitu an ni ang. Season chawhma lam chauh la ni mah se final ang maia pawimawh a ni.
Bundesliga match 15 khelh tawh aṭangin Bayern hian point 39 hmuin hma an hruai mek a, zanina an mikhual tur Leipzig nen hian an point hmuh a inzat - an danglamna chu goal khung tam lamah chauh a ni rih. An inhnehtawk a nih chuan Bayern-in hma an hruai chhunzawm ang.
A hlui leh thar
German-a football inelna sang ber Bundesliga hi kum 1963 aṭanga khelh ṭan tawh niin kumin hi a season 54-na a ni tawh. Vawi 25 champion tawh Bayern Munich hi champion hnem ber leh nomawi kawl mektu an ni a, tun hnai season li chhung chu he league-ah hian chuh-buaitu awm loin roreltu an ni.
RB Leipzig erawh kum 2009 a din chauh kha a ni a, kumin hi Bundesliga-a an inlan vawi khatna a ni. Beisei phak baka ṭhang duang he club hian an season hmasa berah khawvel an barakhaih mek. Match 15 an khelh tawh aṭangin vawi khat chiah chak loh an la nei a, goal 31 khung tawhin anni aia khung tam chu Bayern (35goals) leh Dortmund (34) te chiah an ni!
Kumin Bundesliga team 18 zingah Bayern Munich chu chawhruala upa ber an ni a, an kum chawlhrualin 27.9 an ni. Hetihlai hian Leipzig erawh player-te kum chawhrual chu 24.1 niin an naupang ber thung. Sulhnu nei ṭha ber leh mumang rama cheng mek inkhel tur hi result rinthiam a harsa hle ang.
An incho
Inkhel tur thlirin Leipzig sporting director Ralf Rangnick chuan, "Munich-ah hian point thum hmuh tumin kan kal dawn, kan club chuan draw tumin midang kan hmachhawn ngai lo. Player naupang leh thaza rual kan nei a, kan tan hlauhthawn tur a awm lo.Huaisen takin kan hmabaka inkhelh tur awm chu kan hmachhawn zel ang," a ti. Rangnick hian hnehna chang tur chuan an zavain an theihna zawng zawng an hman a ngaih tur thu a sawi tel bawk.
Leipzig thlen chin apiang hi Bundesliga record a ni zel rih a, division hniam aṭanga kaithar zingah anni anga cheṭha nghal hi tun hmain an la awm ngai lo. Manager Ralph Hasenhuttl tan tun
ṭum hi Bundesliga-a team a kaihhruai vawi 50-na tur chiah a ni ang. Kum 49-a upa Hasenhuttl hian tun hmain FC Ingolstadt a lo en-kawl tawh bawk.
Bayern defender Mats Hummels chuan, "Inkhel har-sa leh khirhkhan tak a ni dawn tih a chiang. Leipzig laka hnehna chang tur chuan tun laia kan khelh dan ṭhin aia ṭhain kan khelh a ṭul ang, anni chuan atir aṭanga a tawp thlengin an theihna zawng zawng an hmang ṭhin. Chuvangin keimahni khelmuala inkhel tur ni mah ila kan fimkhur a ngai takzet," tiin a sawi.
Bayern Munich hian kum 2010 August thla khan FC Kaiserslautern 2-0 in an hneh lo. Hemi hnuah Bavarians hian tun thlengin kaithar team hi hneh loh an tawng leh tawh ngai lo. Striker Robert Lewandowski-a'n season kal mekah goal 17 a khung tawh a, Leipzig lakah hian a pet goal a nih chuan Bundesliga club nilai mek zingah goal a khung kim chiah dawn a ni.