Kum thar thlirtu Saina

World number 1 hlui Saina Nehwal chuan beisei angin season hmang thei lo mah se kum tharah chuan tun hma lama a theihna sang tak ang kha a pholan leh theih a beisei thu a sawi chhuak.

London Olympic bronze medalist Saina hi Rio-ah khan a khup na vangin beisei angin a khel ṭha lo a, Brazil aṭang a haw hnu hian a khup hi zai a ni. A hliam a dam hnuah Macau Open leh Hong Kong Open-ah te quarterfinal a inhlangkai a, final erawh a thleng lo.

Ke phah na leh khup na vanga a inkhelh tam tawk loh avang leh a inkhelh chhunah beisei a phak loh avangin world ranking-ah pawh pakuana a ni mek.

Kum 26-a upa Saina chuan, "Tunah chuan inelna lian hmachhawn tur a awm rih lo a, ka taksa a fit ṭhat theih nana theihtawp chhuah hi ka tih tur pawimawh hmasa chu a ni mai. Thla thum liam ta mai khan ka khup zai a ni a, chumi hnuah tournament lian pahnihah ṭha takin ka inlan leh thei a, kha vang khan beiseina ka nei sang - kum tharah chuan ṭha takin ka khel thei leh tawh ang," a ti.

Kuminah Saina-i'n beisei phak lo mah se Indian badminton tan lawmna tur a awm tho. PV Sindhu chuan Rio Olympic-ah silver medal a vaw chhuak a, Pathiannia a khelh zawh tak Dubai Super Series Finals-ah semifinal a khel bawk.

Saina chuan, "Sindhu tan kum ṭha tak a ni a, China Open nomawi a chawi bakah Hong Kong-ah final a lut bawk. A hmasawn dan thlirin kum tharah chuan nomawi tam zawk a chawi theih ka beisei," tiin a sawi.