Kum 65 thleng ka inkhel thei ang - Buffon

A kum tam deuh tawh mah se a ṭhatna a la tlahniam lo. Juventus goalkeeper Gianluigi Buffon chuan kum 65 a tlin thlengin a inkhelh theih a beisei thu fiamthuin a sawi.

Italy international hi nakkum January thlaah chuan kum 39 a tling tawh dawn a, Serie A champion lai Juve tana a contract neih lai pawh season tawp rual hian a tawp ve tawh dawn. Heti chung hian Buffon hian chawlh lam a la ngaihtuah lo, kum 2018 World Cup kheh a la inbeisei thu pawh a lo sawi chhuak tawh.

Juve tana match 473 khel tawh Buffon chuan, "Kum 38 ni tawh mah ila ka taksa leh rilru a la upa ve lo! Hetiang renga ka kal thei a nih chuan tunge kum 65 ka tlin thlengin ka inkhel lo ang tih sawi thei? Ka nunah hian harsatna leh buaina hrang hrang a thleng ve fo a, mahse chungte chu ka inhnehtir ngai lo. Inkhela hnehna kan chan hian beiseina thar min pe ṭhin a, kan chak lo a nih pawhin chona ṭha zawkah ka ngai mai ṭhin," tiin a sawi.

Buffon hi kum 1997 aṭang khan Italy tan a inlan tawh a, tunah hian match 167 khel tawhin an ram tan a ni aia inlan tam an awm lo. Club lamah Parma chu a bulṭanna niin kum 2001 khan tun thlenga a khelhna Juventus hi a zawm.

A hun hmasa lam sawiin Buffon chuan, "Kum 13 mi ka nih khan drug hi ka lo hnar tawh. Parma-ah khan mi pakhatin drug chu ti ve tur leh hlimna a nih thu min hrilh a, kei chuan ka hnar - min thlemtu hi kum thum hnuah drug vang hian a thi zui. Duhthlanna dik ka hman ṭhin avang leh ka nungchang leh rilru puthmang vang hian ṭha takin ka inkhelh theih phah niin ka hria," tiin a sawi.