Hopman Cup khel tur Federer

Tennis khawvela sulhnu nei ṭha ber Roger Federer chuan season thara Grand Slam tournament hmasa ber Australian Open inbuat-saih nen Hopman Cup a khelh tur thu a ti chiang ta.

Grand Slam vawi 17 champion tawh Federer hi kumin kumtir lam khan a vawi khat nan a khup zai a ni. A hliam a dam hnuah Wimbledon khel lehin semifinal-ah Milos Raonic a hneh lo - hemi ṭum hian a khup a hliam nawn leh. Swiss thiampuipa hi a hliam vangin Rio Olympic-ah a inlan lo. Hun rei zawk a inkhelh zel theih nan midang aia hmain a season a khar a ni.

Kum 35-a upa Federer chuan, "Ka doctor-in thurawn min pek angin hun rei zawk ṭha taka ka inkhelh theih nan chawlh ka mamawh thu min hrilh a, chuvangin ka chawl hma a ni," a ti.

Federer chuan sawi chhun-zawmin, "Tunah hian ka inkhel leh thei tawh a, kum tharah chuan kumin aia tam zawk inelna ka hmachhawn theih ka beisei. Australian Open inbuatsaih nan Hopman Cup-ah ka inlan ang," tiin a sawi.

Kum 1989 aṭanga neih ṭan Hopman Cup hi ram leh ram tennis team hmanga inelna a ni a, mipa leh hmeichhe tan a ni. Nakkum hi vawi 29 an neihna tur chiah niin ram pariat an inlan dawn a, Australia rama khawthlang lam Perth-ah khelh a ni ang.

Federer-a te ram Switzerland hi Group A-ah France, Germany leh Great Britain te nen an awm. Swiss hian an match hmasa ber atan Janaury 2 hian Britain an hmachhawn ang.