FIFA-in UK ramte a hrem

United Kingdom awpna hnuaia ram pali England, Scotland, Wales leh Northern Ireland te chu FIFA chuan dan bawhchhiaa World Cup qualifier-a poppy (pang-par lem) armband an hren leh tih lan vangin pawisa chawi turin a hrem.

November 11 kha Armistice Day a ni a, he ni hi Indopui pakhatna tawp dawna ṭangrual pawl leh Germany ten inremna an ziah champha a ni. Armistice Day bawr vela World Cup qualifier match nei English leh Scottish Football Association te chuan Indopuinaa nunna chan sipaite hriatreng nan pangpar (poppy) chuanna armband hren hi FIFA hnenah an lo dil tawh a, politics, sakhua leh sumdawnna lam hawi zawnga thuchah lantir phal lohna dan neitu FIFA chuan an dilna hi hnawlsak mah se UK ram te hian an thil tum chu an kaltlangpui tho a ni.

England leh Scotland player-te hian November 11 khan World Cup qualifier khelin armband hren phal loh hi an hreng a, Wales leh Northern Ireland player ten arma-band hreng lo mah se khelmualah Armistice Day puala hun an hman avangin hrem an ni.

FIFA chuan England hi £35,311 chawi turin a hrem a, Football Association chuan hrem an nihna hi an khinglet dawn. Scotland leh Wales chu £15,694 ve ve chawitir niin Northern Ireland chu £11,770 chawitir an ni thung a, ram pathumte hian an khinlet dawn leh dawn lohah thutlukna an la siam lo thung.

FIFA disciplinary com-mittee chairman Claudio Sulser chuan Armistice Day puala UK hnuaia ram pali ten hun an hman chu zah viau mah se an dan neihsa chu an kaltlangpui a ngaih avanga thutlukna siam an nih thu a sawi.