Merseyside khawtual a sen mawi

"Football hi khawvela thil pawimawh ber a ni hauh lo a, mah se Thawhṭanni zana minute 90 chhung chu Liverpool-ah football aia pawimawh a awm lo ang," tiin Jurgen Klopp-a'n Merseyside Derby boruak sanzia a sawi a, Goodison Park-a team pahnih inhmachhawna chungnung zawk chu Liverpool an ni.

Sadio Mane chuan Mersey-side Derby a hmachhawn vawi khatnaah goal a khung nghal a, Senegalese forward hian injury time-ah he inkhela goal awmchhun hi khungin 1-0 in hnehna an chang - team pahnih an inhmachhawn hnuhnung 20-ah Everton hian vawi khat chiah chak hmel an la hmu!

Goodison Park-a inkhelah goal lut har viau mah se inkhel pumpui thlirin Liverpool chu chak phu zawk an ni. Roberto Firmino-a'n hun ṭha vawi hnih lai nei mah se Brazilian forward hi second half-a hliam vanga lak chhuah goalkeeper Maarten Stekelenburg leh amah thlaktu Joel Robles ten ṭha takin an dang ve ve a, Daniel Sturridge-a'n goal ban a pet per aṭanga Mane goal khung tur erawh dan rual a ni lo.

Reds an kal zel

Premier League champion tum Reds hi table-ah pahnihna dinhmunah an awm lehnghal a, hmahruaitu Chelsea an phak lohna chu point ruk a ni. Liverpool manager Jurgen Klopp-a'n hun tawp hamrik a rik rualin ṭum dang ang bawkin an chak a lawm a, German coach hi a chet dan aṭangin cham-pion a tum tih hai rual a ni lo.

Inkhel ṭantir lamah Liver-pool-in Klopp-a hnuaia an game rang leh hmuhnawm lantir thei lawk lo mah se an insiam-
ṭha thuai a, hun tawp thlengin inkhel an thunun. Klopp-a'n inkhelh hmain, "Minute 20 lek pawh Sturridge kan neih chuan ṭhatpui tham a ni," tiin hliam damkawr Daniel Sturridge chungchang a sawi a, Borussia Dortmund boss hlui thusawi dikna hmuh turin a awm.

English striker hian minute 82-naah Divock Origi thlakin khelmualah a tlan lut a, Everton tlarhnung tan manganna belhchhahtu a ni. Reds goal luh nan kum 27-a upa striker hian
ṭha taka ball a khalh luh hnuah post a pet per a, ball khalhtu Sturridge chet ṭhat tluk zeta rangin Mane-a inlar a, pound maktaduai 34 man forward hian Liverpool an inseng thlawn lo tih lantir nan chakna goal a khung - Bournemouth leh West Ham laka an chak zawh loh hnuah Liverpool-in Middlesbrough leh Everton lakah a zawnin an chak leh ta.

A rei lua

Everton-in Merseyside Derby a chak hmel an hmuh hnuhnun ber chu October 2010 daih kha a ni tawh a, Roy Hodgson-a enkawl Liverpool chu 2-0 in an hneh. Dutch coach Ronald Koeman enkawlna hnuaiah beiseina sang tak nen an hmelma kumhlun hi hneh theih tawh inbeisei mah se thawnthu hlui kha ziah danglamin a la awm lo.

Minute 45 chhung chu Everton hian Koeman-a beisei angin game rang tak khel thei mah se chawlhlawk hman a nih hnuah ngai an awh leh tawh lo a, hliam vanga lakchhuah James McCarthy chu an buaina belhchhahtu a ni. Substitute Gareth Barry-a'n Premier League match 610-na khelin khelh tam lamah Ryan Giggs chiah phak lo mah se a upa ve tawh tih hmuh hmaih rual a ni lo a, Everton game plan rang kaihruai turin a ṭha tawk lo.

Inkhel pumpui thlira vannei ber erawh Ross Barkley a ni. Everton midfielder hian atthlak takin Jordan Henderson a tlawh a, England tana a khelhpui midfielder hi hliam a tawrh loh avanga a vanneih rualin Barkley hian red card a chawi lo chu a vanneih pui hle. Reds captain Hendo chuan, "Barkley khan a hnuah ngaihdam min dil a ni," tiin an inkarah buaina a awmzui loh thu a sawi.

Manager thukhawchang

Everton manager Ronald Koeman chuan, "Hun pek belha goal kan chhuah avangin a pawi lehzual a, minute riat lek kha kan thawhrimna thaibo tu a ni. Sadio Mane chet ranzia chu a hretu ka ni a, goal chhuah kha kan phu lo. Ross Barkley a vannei a, a chet dan kha a hlauhawm a ni," tiin a sawi a, a player a chhan lo.

Dutch coach hian Maarten Stekelenburg hliam chu a dinhmun tur an la chian loh thu a sawi a, malpui hliam James McCarthy hliam rei chhung tur a sawi lo bawk.

Liverpool manager Jurgen Klopp chuan, "Firts half chhe tak kan khelah ka ngai hran lo a, chutihrualin game ṭha tak kan khelah ka ngai hran lo bawk. Second half-ah erawh inkhel thununtu kan ni a, hnehna kan chan avangin ka lawm a ni," a ti a, red card hmu lo Barkley leh inhliam loa inkhel tluan thei Hendo te chu an vanneih ve ve thu a sawi.